काठमाडौँ । सुन तस्करी प्रकरणमा पक्राउ परेका पूर्वसभामुख तथा माओवादी केन्द्रका उपाध्यक्ष कृष्णबहादुर महरालाई नर्भिक अस्पतालमा लगिएको छ । काठमाडौँ जिल्ला अदालतले सोमबार चार दिन हिरासतमा राखेर अनुसन्धान गर्न समय दिएपछि स्वास्थ्य परीक्षणका लागि उनलाई नर्भिक अस्पताल लगिएको हो ।
यसअघि उनलाई अपरान्ह सरकारी वकिलको कार्यालयमा उपस्थित गराइएको थियो । सोमबार बिहान कपिलवस्तुबाट पक्राउ परेका उनलाई काठमाडौँ ल्याएर अपरान्ह रामशाहपथस्थित सरकारी वकिलको कार्यालयमा उपस्थित गराइएको हो ।
सुन तस्करी प्रकरणमा उच्चस्तरीय जाँचबुझ आयोगको प्रतिवेदनमा महराको संलग्नता देखिएपछि नेपाल प्रहरीको केन्द्रीय अनुसन्धान ब्युरो (सीआईबी) ले पक्राउ गरेको हो ।
उनी भारत भाग्दै गर्दा पक्राउ परेका हुन् । अवैध सुन तस्करी प्रकरणमा नाम जोडिएपछि भारत भगाइन खोज्दा बाटैमा महरा पक्राउ परेका छन् ।
उनलाई पार्टीले नै भगाउन खोज्दा पक्राउ परेका हुन् । महरालाई भारतको सीमावर्ती जिल्ला कपिलवस्तुको मायादेवी १ पकडीबाट प्रहरीले पक्राउ गरेको हो ।
प्रहरी प्रशासनले यहाँ उनलाई कुनै पनि बेला समात्ने भइसकेपछि पार्टी अध्यक्षसमेत रहेका प्रधानमन्त्री पुष्पकमल दाहाल प्रचण्डले उनलाई भारततर्फ भाग्न सहज हुने गरी काठमाडौँ छोड्न लगाएका थिए ।
कतिपयले उनी रोल्पा तिरै भूमिगत हुनै क्रममा कपिलवस्तुको बाटो हुँदै रोल्पा जान खोजेको बताए पनि उच्च स्रोतले भारततर्फ भाग्न लागेको दाबी गरेको छ ।
उपप्रधान एवं गृहमन्त्री रवि लामिछानेले आइतबार बिहान नेकपा माओवादी केन्द्रका नेतासमेत रहेका महरासहितलाई तत्काल कारबाही गर्न निर्देशन दिएका थिए।
गृह सचिव एकनारायण अर्याल, प्रहरी महानिरीक्षक वसन्त कुँवर र नेपाल प्रहरीको केन्द्रीय अनुसन्धान विभागका प्रमुख श्याम ज्ञवालीलाई सुन तस्करी नियन्त्रण सम्बन्धी जाँचबुझ आयोगको प्रतिवेदन तत्काल कार्यान्वयन गर्न आग्रह गर्दै महरालाई पक्राउ गर्न निर्देशन दिएका थिए ।
ब्रेक सु र विद्युतीय चुरोट (भेप) मा लुकाएर ल्याइएको सुन तस्करीमा महराको नाम जोडिएको छ । महराका छोरा राहुल जेलमै छन् ।
