काठमाडौँ । नेपाली कांग्रेसका सभापति शेरबहादुर देउवा आफ्नो अडानबाट टसको मस नहुँदा मात्र दुई जना उम्मेदवार टुंगो लगाउने प्रयास तीन दिनदेखि सफल हुन सकेको छैन ।
आगामी बैशाख १५ गते इलाम २ को प्रतिनिधि सभा र बझाङ १ (क) को प्रदेश सभा निर्वाचनका लागि दुई उम्मेदवार टुंगो लगाउन देउवा असफल भएका हुन् ।
मंगलबार र बुधबार बसेको कार्यसम्पादन समिति बैठकले पनि निर्णय गर्न नसकेपछि बिहीबार बिहान ९ बजे बैठक बस्ने गरी बुधबारको बैठक टुंगिएको छ ।
यो बैठक भन्दा अगाडि र पछाडि थुप्रै साइड बैठक भएका थिए । तर त्यसबाट पनि कुनै पार लागेको छैन ।
पहिले बोर्डको र त्यसपछि कार्यसम्पादनको बैठक बसेको भए पनि सहमति हुन नसकेको हो ।
देउवाले दुई जनाको नाम प्रस्तुत गरेको भए पनि कांग्रेसको संस्थापन र संस्थापन इतर पक्ष टसको मस नभएपछि बैठकले दुई उम्मेदवारको टुंगो लाग्न नसकेको हो ।
सभापति देउवाको निवास बूढानीलकण्ठमा सोमबारदेखि नै बैठक चलिरहेको छ । लामो समय भैसक्दासमेत बैठकले कुनै टुंगो लगाउन नसकेको हो ।
पटक पटक पदाधिकारी, पूर्व पदाधिकारी र कार्यसम्पादन समितिका सदस्यहरुबीच छलफल चले पनि निष्कर्ष ननिस्केको हो ।
यसअघि मंगलबार रातिसम्मै सभापति देउवा, उपसभापतिद्वय पूर्णबहादुर खड्का र धनराज गुरुङ, महामन्त्रीद्वय गगनकुमार थापा र विश्वप्रकाश शर्मा, सहमहामन्त्रीहरु बद्री पाण्डे, जीवन परियार लगायतका पदाधिकारीहरु छलफलमा जुटेका थिए ।
यसअघि सोमबार सभापति देउवाले पदाधिकारी र पूर्वपदाधिकारीको बैठक डाकेर सम्भावितहरुको बारेमा छलफल गरेका थिए ।
सो छलफलमा स्थलगत अध्ययन गरेका नेताहरुले सम्भावित उम्मेदवार र त्यहाँको वस्तुस्थितिबारे जानकारी गराएका थिए ।
महामन्त्री विश्वप्रकाश शर्माले आन्तरिक रुपमा कांग्रेस एकढिक्का भए दुवै सिटमा कांग्रेसले जित्ने बताएका थिए ।
उनले कांग्रेस अहिले बलियो रहेको र नेताहरुबीच समझदारी भएर बलियो उम्मेदवार उठाउने हो भने दुवै सिट कांग्रेसले जित्ने बताएका थिए ।
महामन्त्री गगनकुमार थापाले पनि विभिन्न तहबाट लिइएको तथ्याङ्कलाई आधार मानेर पहिलो नम्बरका सिफारिस परेका सम्भावित उम्मेदवारलाई नै प्राथमिकता दिनुपर्ने बताएका थिए ।
त्यस्तै सुदूरपश्चिम प्रदेशका सभापति वीरबहादुर बलायरले बझाङ १ (क) का आकांक्षी र उनीहरुको पकडका बारेमा जानकारी गराएका थिए ।
सहमहामन्त्री भीष्मराज आङ्देम्बेले पनि स्थानीय तहमा अहिले कांग्रेस बलियो भएकाले पनि जित टाढा नरहेको बताए । तर कांग्रेसबीचको एकता अनिवार्य भएकामा उनको जोड थियो ।
मंगलबारको छलफलका क्रममा डा. शेखर कोइराला र डा. शशांक कोइरालाले विशेष गरी इलाम २ मा जसको नाम एक नम्बरमा छ उसैलाई उम्मेदवार बनाउनु पर्ने अडान राखेका थिए ।
उनीहरुले तल्लो तहबाट आएको सिफारिसलाई केन्द्रले तलमाथि गर्न नमिल्ने बताएका थिए ।
इलाम २ को निर्वाचन
इलाम २ मा यसअघि एमालेले जितेको थियो । एमालेका उपाध्यक्ष एवं संविधान सभाका अध्यक्ष सुवासचन्द्र नेम्वाङको गत भदौ २६ गते निधन भएपछि उक्त क्षेत्र खाली भएको हो । नेम्वाङले त्यतिबेला कांग्रेसका उम्मेदवार डम्बर खड्कामाथि संघर्षपूर्ण जित हासिल गरेका थिए ।
जसका कारण यसपालि एमालेलाई जितका लागि निकै संघर्ष गर्नुपर्ने देखिएको छ । एमालेले नेम्वाङकै छोरा सुहाङ नेम्वाङलाई उम्मेदवार बनाएको छ । उनको उम्मेदवारीलाई लिएर एमालेभित्रै फुट देखिएको छ ।
नेम्वाङ जीवित छन्जेल निरन्तर आफू नै चुनाव लडिरहेको र निधन भएपछिसमेत उनकै छोरालाई उम्मेदवार बनाइएपछि असन्तुष्टि ब्याप्त भएको हो ।
यही असन्तुष्टहरुको मत पनि कांग्रेसले लिने गरी बलियो उम्मेदवार उठाउनुपर्नेमा पदाधिकारीहरुले जोड दिएका छन् ।
उपनिर्वाचनका लागि कांग्रेस क्षेत्रीय कार्यसमितिले चैत ६ गते उम्मेदवारको नाम सिफारिस गरेको थियो । इलामको चुलाचुलीमा बसेको पार्टी क्षेत्रीय कार्यसमितिको बैठकले उमेदवारको नाम सिफारिस गरेको हो । क्षेत्रीय सभापति डिकेन्द्र इदिङ्गोका अनुसार विधानले दिएको अधिकार र व्यवस्था अनुसार आकांक्षीहरुको नाम पठाइएको हो ।
बैठकबाट पहिलो नम्बरमा महासमिति सदस्य एवम् महाधिवेशन प्रतिनिधि भेषराज आचार्यको नाम समावेश गरेर पठाइएको छ । दोस्रो नम्बरमा पूर्वसांसद केशव थापा, जिल्ला सभापति डम्बर खड्का, संविधान सभा सदस्य नगेन्द्र कुमाल र नेता रमेश लिङ्देनको नाम सिफारिस गरिएको छ ।
बैठकले आकांक्षीद्वय चन्द्रमाया लिम्बू र शान्तिकला तामाङको नाम तेस्रो नम्बरमा सिफारिस गरेर पठाएको छ । सिफारिस भएका नामहरू जिल्ला र प्रदेश कार्यसमितिले राय लेखेर पठाएका छन् भने केन्द्रले आज फाइनल गर्दैछ ।
विशेष गरी आचार्य र खड्कामध्ये एकको सम्भावना बलियो रहेको बताइएको छ ।
इलाम २ कांग्रेसको बलियो क्षेत्र मानिन्छ । राष्ट्रिय राजनीतिमा स्थापित नेम्बाङको निधनपछि मुख्य प्रतिस्पर्धी एमालेभित्र उम्मेदवारमा रस्साकस्सी चलिरहेको बेला कांग्रेसले यसपटक सकारात्मक परिणाम निकाल्ने अपेक्षा गरिएको छ ।
बझाङ १ (क)
बझाङ प्रदेश सभा १ का सांसद एवं सुदूरपश्चिम प्रदेशका आन्तरिक मामिला तथा कानून मन्त्री पृथ्वीबहादुर सिंहको गत असार ५ गते सवारी दुर्घटनामा परी निधन भएको थियो ।
त्यसपछि उक्त क्षेत्र खाली छ । उक्त क्षेत्रमा अहिले स्वर्गीय सिंहका छोरा अभिषेक सिंहसँगै सत्यराज भण्डारी, विष्णुकुमार सिंह, जगतप्रसाद जोशी, नन्दकृष्ण जोशी, लोकेन्द्रबहादुर रोकाया, शान्तिकुमारी बोहरा, अर्जुन स्याडाँ, ध्रुवराज उपाध्याय र नारायण हमालको नाम सिफारिस भएको छ ।
सबै एकसे एक भए पनि स्वर्गीय सिंहका छोरा अभिषेकको सम्भावना बलियो भएको बुझिन्छ । उनलाई सहानुभूतिको भोटसमेत आउने आँकलन भइरहेको छ । दुर्घटनामा उनका बाबुमात्र हैन आमा अमृताकोसमेत निधन भएको थियो ।
