एसीसी प्रिमियर कपमा नेपालको विजयी शुरुआत, मलेसियामाथि ५ विकेटको जित

हाम्रा कुरा

प्रकाशित २०८० चैत ३० शुक्रबार

काठमाडौँ । ओमानमा चलिरहेको एसीसी प्रिमियर कप टी–२० क्रिकेट प्रतियोगितामा नेपालले विजयी शुरुआत गरेको छ । नेपालले पहिलो खेलमा मलेसियालाई ५ विकेटले पराजित गरेको हो ।

ओमानको अल अमेरत क्रिकेट मैदानमा १४४ रनको चुनौती नेपालले १९ ओभर २ बलमा ५ विकेटको क्षतिमा पूरा गरेको हो ।

नेपालका लागि आसिफ शेखले ३५ बलमा ३२, कप्तान रोहित पौडेलले २४ बलमा २८, कुशल भुर्तेलले २४ बलमा २४, दिपेन्द्र सिंहले ११ बलमा २०, गुल्सन झाले ७ बलमा अविजित रहँदै १९ तथा सन्दीप जोराले ९ बलमा अविजित रहँदै १२ रन बनाए ।

खेलमा मलेसियाले टस जितेर पहिले ब्याटिङ गर्दैै ३ विकेटको क्षतिमा १४३ रन बनायो । कप्तान विरनदीप सिंहले ५७ बलमा अविजित रहँदै ७२ रन बनाए ।

शरविन मुनिअन्डीले ३३ बलमा ४१ तथा मुहमद अमिरले १८ बलमा १६ रन बनाए । नेपालका लागि बलरहरुले कुनै जादू देखाउन सकेनन् ।

दिपेन्द्र सिंह ऐरीले २ तथा अविनाश बोहराले १ विकेट लिए ।

प्रतियोगितामा विभिन्न १० टोलीको सहभागिता रहेको छ । नेपाल रहेको समूह ए मा नेपाल र मलेसियासहित हङकङ, कतार र साउदी अरेबिया रहेका छन् । यो समूहको दोस्रो खेलमा कतार र हङकङले खेलेका छन् ।

समूह बीमा यूएई, ओमान कुवेत, बहराइन र कम्बोडिया रहेका छन् । पहिलो खेलमा ओमानले बहराइनलाई ३ रनले तथा यूएईले कुवेतलाई ७ विकेटले हराएको छ ।