पाङग्रा पड्केर स्कार्पियो दुर्घटना हुँदा दुई जनाको मृत्यु, चार घाइते
हाम्रा कुरा
प्रकाशित २०८१ असार ८ शनिबार
419
Shares
रौतहट । पूर्व पश्चिम राजमार्ग अन्तर्गत रौतहटको चन्द्रपुर नगरपालिका–४ धन्सार पुल छेउँमा पाङग्रा पड्केर भारतीय नम्बर प्लेटको स्कारपियो दुर्घटना हुँदा दुई जना भारतीय नागरिकको मृत्यु भएको छ । शुक्रवार साँझ भएको दुर्घटनामा चालकसहित गाडीमा सवार चार जना घाइते छन् ।
सर्लाहीको बाग्मती नगरपालिकास्थित भरत ताल घुमेर बाराको पिलुवा तर्फ जाँदै गरेको बिआरजिरो ५ एटि ५९६३ नम्बरको स्कारपियो गाडीको पछाडि देब्रे तिरको चक्का पड्किएर अनियन्त्रित भई राजमार्गबाट तल खसेको थियो ।
गाडी खयरको रुखमा ठोक्किएर क्षतिग्रस्त गाडीमा सवार दुई जनाको मृत्युसँगै ४ जना घाइते भएको जिल्ला ट्राफिक प्रहरी कार्यालय चन्द्रिगाहपुरका प्रमुख इन्स्पेक्टर सुशील आचार्यले बताएका छन् ।
मृत्यु हुनेमा भारत बिहार पूर्वी चम्पारण जिल्ला ग्राम पञ्चायत झिट्काहिया ४ का ३५ वर्षीय तमन्ना शेख रहेको प्रहरीले जनाएको छ।
त्यस्तै सोही ठाउँका २१ वर्षीय इर्फान आलमको मेडिसिटी बयोधा अस्पताल वीरगंजमा उपचारको क्रममा मृत्यु भएको प्रहरीले जनाएको छ ।
गाडी चालक २२ वर्षीय सोहेल अमिरसमेत घाइते भएका थिए । घाइतेहरुको वीरगंजमा उपचार भएको प्रहरीको भनाइ छ ।
