आफूलाई धम्की आइरहेको भन्दै बलात्कार मुद्दामा पीडितले सन्दीपविरुद्ध मुद्धा अगाडि नबढाउन दिइन् निवेदन
हाम्रा कुरा
प्रकाशित २०८१ साउन ११ शुक्रबार
409
Shares
तस्बिर – फाइल ।
काठमाडौँ । बलात्कार मुद्दामा पीडित गौशाला–२६ ले क्रिकेटर सन्दीप लामिछानेविरुद्ध मुद्धा अगाडि नबढाउन निवेदन दिएकी छिन् । गौशाला–२६ ले सरकारी वकिलको कार्यालयमा आफैँ ले निवेदन लेखेर सन्दीपविरुद्ध मुद्धा अगाडि नबढाउन निवेदन दिएकी हुन् ।
गौशाला–२६ ले आफूलाई मानसिक रुपमा अप्ठ्यारो परेको भन्दै अब यस मुद्धामा लागिरहन नसक्ने निष्कर्षमा पुगेको निवेदनमा उल्लेख गरेकी छिन् ।
उनले आफूलाई अहिले पनि धम्की आइरहेको र सामाजिक सञ्जालमा अनावश्यक टिप्पणी भइरहेकोले त्यसले आफूलाई मानसिक रुपमा असर गरिरहेको निवेदनमा उल्लेख गरेको सरकारी वकिलको कार्यालय स्रोतले बताएको छ ।
सन्दीपविरुद्धको मुद्धामा उच्च अदालत पाटनले काठमाडौँ जिल्ला अदालतको आदेशलाई उल्टाउँदै निर्दोष रहेको फैसला दिएको थियो । उच्च अदालत पाटनका न्यायाधीशद्वय सुदर्शनदेव भट्ट र अञ्जु उप्रेती ढकालको संयुक्त इजलासले सन्दीपलाई सफाई दिएको थियो ।
यसअघि काठमाडौँ जिल्ला अदालतले सन्दीपलाई गत पुस २५ मा जबर्जस्ती करणी मुद्दामा दोषी ठहर गर्दै ८ वर्ष कैद र ५ लाख जरिबाना सुनाएको थियो ।
