काठमाडौँ। सीजी हस्पिटालिटी होल्डिङ्सका प्रबन्ध निर्देशक एवं प्रमुख कार्यकारी अधिकृत राहुल चौधरी लगातार पाँचौँ वर्ष प्रतिष्ठित ‘होटेलियर पावर लिस्ट २०२४’ मा सूचीकृत भएका छन्। होटेलियर इन्डियाले हालै सार्वजनिक गरेको यो सूचीमा विश्वका अग्रणी होटेल चेनका नेतृत्वकर्ताहरू समावेश छन्।
होटेलियर पावर लिस्टमा समावेश हुनु भनेको विश्व आतिथ्य उद्योगमा उल्लेखनीय योगदान पुर्याएको मान्यता हो। यस सूचीमा ओबरोय होटल्स, ह्यात, हिल्टन, आईएचजी, म्यारियोट र एकोर जस्ता विश्व प्रसिद्ध ब्रान्डहरू समावेश छन्। ‘मैले यो सम्मानलाई सीजी हस्पिटालिटीको विश्वव्यापी विस्तार र वल्र्डक्लास सर्भिसको रूपमा लिएको छु,’ चौधरीले भने, ‘यसले हाम्रा पाहुनाहरूलाई प्रदान गर्ने उत्कृष्ट सेवा र गुणस्तरको प्रतिबिम्ब गर्छ। लगातार पाँचौँ वर्ष होटेलियर इन्डिया पावर लिस्टमा समावेश हुन पाउँदा म अत्यन्तै गौरवान्वित छु।’
सीजी हस्पिटालिटी होल्डिङ्सले हाल १२ देशका ११६ गन्तव्यहरूमा १८५ भन्दा बढी होटेल तथा रिसोर्टहरू सञ्चालन गरिरहेको छ, जसमा ११,००० भन्दा बढी किज (रुम) रहेका छन्। कम्पनीको लक्ष्य सन् २०२५ सम्ममा २०० भन्दा बढी होटेलहरू र १२,००० कूजहरि सञ्चालन गर्ने रहेको छ।
सीजी हस्पिटालिटीका साझेदार ब्रान्डहरूमा ताज, भिभान्ता, जेटविङ, र्याडिसन र फेयरमोन्ट जस्ता ब्रान्डहरू समावेश छन्। यसका साथै सीजी हस्पिटालिटीको स्वामित्वमा द जिंक, द फर्न, समिट र द फार्म जस्ता ब्रान्डहरू पनि रहेका छन्।
सीजी हस्पिटालिटीको इतिहास दुई दशकभन्दा लामो छ। यसको सुरुवात टाटा समूहको आईएचसीएलसँग मालदिभ्समा ताज एक्जोटिका रिसोर्ट एन्ड स्पा र ताज कोरल रिफ, कोलम्बोमा ताज समुद्र र भारतमा ताज सफारीका ४ होटेलहरूमा लगानी गरेर भएको थियो।
‘सीजी हस्पिटालिटीको रणनीतिक साझेदारीमा केन्द्रित दृष्टिकोण, हाम्रो सम्पूर्ण हस्पिटालिटीका कर्मचारीहरूको समर्पण र दृष्टिकोणप्रतिको प्रतिबद्धता नै हाम्रो सफलताको मूल आधार हो। यसले आतिथ्य उद्योगमा हाम्रो प्रतिबद्धतालाई प्रतिबिम्बित गर्दछ,’ चौधरीले भने।
राहुल चौधरीको यो उपलब्धि र सीजी हस्पिटालिटीको विश्वव्यापी विस्तारले नेपाली उद्यमीहरूको अन्तर्राष्ट्रिय स्तरमा बढ्दो प्रभाव र पहिचानलाई प्रदर्शित गर्नुका साथै नेपाली व्यावसायिक नेतृत्वको विश्वव्यापी सम्भावनालाई उजागर गरेको छ।
