माइक्रोको ठक्करबाट मोटरसाइकल चालकको मृत्यु, एक घाइते

हाम्रा कुरा

प्रकाशित २०८१ असोज २० आइतबार

नवलपरासी । नवलपरासीमा सवारी दुर्घटना हुँदा एक जनाको ज्यान गएको छ । नवलपरासीको सुनवल नगरपालिका वडा नं. ७ ज्यामिरेमा माइक्रोबसको ठक्करबाट मोटरसाइकल चालकको मृत्यु भएको छ ।

साथै मोटरसाइकलको पछाडि सवार अर्का एक जना घाइते भएका छन् ।

प्रहरीका अनुसार पूर्व-पश्चिम राजमार्गअन्तर्गत सुनवलको ज्यामिरे चोकमा लु१ख ८४५३ नम्बरको माइक्रोले लु७९प ९१४० नम्बरको मोटरसाइकललाई ठक्कर दिँदा दुर्घटना भएको हो ।

मृत्यु हुनेमा तिलोत्तमा नगरपालिकाका ३२ वर्षीय ऋषि लम्तरी रहेका छन् । दुर्घटनामा गम्भीर घाइते भएका उनको भलुही मेडिकल कलेजमा उपचारका क्रममा मृत्यु भएको प्रहरीले जनाएको छ ।

दुर्घटनामा परी विवेक गुरुङ घाइते भएका छन् । उनको सोही अस्पतालमा उपचार भइरहेको छ । माइक्रो र चालकलाई नियन्त्रणमा लिएर दुर्घटनाबारे अनुसन्धान भइरहेको प्रहरीले जनाएको छ ।