न्यूजिल्याण्डविरुद्धको पहिलो टेष्टमा भारतको लज्जास्पद शुरुआत

हाम्रा कुरा

प्रकाशित २०८१ कार्तिक १ बिहिबार

काठमाडौँ । न्यूजिल्याण्डविरुद्धको पहिलो टेष्ट क्रिकेटमा भारतले लज्जास्पद शुरुआत गरेको छ । घरेलु बैंगलुरुको मैदानमा पहिलो दिन वर्षाले हुन नसकेको खेल दोस्रो दिन बिहीबार टस जितेर पहिले ब्याटिङ गरेको भारतले १० ओभर खेल्दा ३ विकेट गुमाएर १२ रनमात्र जोडेको छ ।

लज्जास्पद शुरुआत गरेको भारतका लागि विराट कोहली र सर्फराज खान शून्यमा आउट भएका छन् भने कप्तान रोहित शर्मा २ रनमा आउट भएका छन् ।

ओपनर यशस्वि जैसवालमात्र टिकेका छन् । तीन टेष्ट खेल्न न्यूजिल्याण्ड भारत आएको हो ।

आईसीसी विश्व टेष्ट च्याम्पियनशिपमा भारत ११ खेलबाट ७४.२४ अंकसहित शीर्ष स्थानमा रहेको छ भने न्यूजिल्याण्ड ८ खेलबाट ३७.५० अंकसहित छैटौँ स्थानमा रहेको छ ।

फाइनल प्रवेशका लागि भारतलाई निरन्तर जीत जरुरी छ भने न्यूजिल्याण्ड लगभग फाइनल होडबाट बाहिरिएको छ ।

यद्यपि आफू अनुकुल नतिजा पार्नका लागि न्यूजिल्याण्डले अबको सबै खेलमा शानदार फराकिलो अन्तरसहित शतप्रतिशत नतिजा ल्याउनु जरुरी छ ।