काठमाडौँ । मध्य भोटेकोशी जलविद्युत कम्पनी लिमिटेडको शेयरको ‘लक इन’ अवधि सकिन अब १२ दिनमात्र बाँकी रहेको छ ।
कम्पनीको संस्थापक शेयर, स्थानीय बासिन्दा, यस कम्पनीका कर्मचारी, कर्मचारी सञ्चय कोषमा रकम जम्मा गरेका सञ्चितकर्ता कर्मचारी, संस्थापक शेयरधनी, संस्थाका कर्मचारी र ऋणदाता संस्थाका कर्मचारीलाई बाँडफाँट भएको शेयरको ‘लक इन’ कार्तिक ११ गते सकिने भएको हो ।
लक इन अवधि सकिएपछि होल्ड गरेको उक्त शेयर कारोबारका लागि योग्य हुनेछ । कम्पनीले सर्वसाधारणलाई २०७८ कार्तिक १२ गते शेयर बाँडफाँट गरेको थियो ।
उक्त मितिबाट ३ वर्षसम्म संस्थापक शेयरधनी, स्थानीय बासिन्दा र कर्मचारीहरुको शेयर लक इनमा राख्नुपर्ने व्यवस्था रहेको छ ।
कम्पनीको ३ करोड ६ लाख कित्ता संस्थापक शेयर, कर्मचारी सञ्चय कोषमा रकम जम्मा गरेका सञ्चितकर्ता कर्मचारीको १ करोड १७ लाख, संस्थापक शेयरधनी संस्थाका कर्मचारीको २१ लाख, ऋणदाता संस्थाका कर्मचारीको ६ लाख, स्थानीयको ६० लाख र यस कम्पनीका कर्मचारीको ३ लाख ६० हजार कित्ता शेयर लक इन रहेको छ ।
उक्त लक इन कार्तिक १२ गतेदेखि फुकुवा हुनेछ । कम्पनीले जारी गरेको सूचनामा भनिएको छ, 'शेयरहरु धितोपत्र दर्ता तथा निष्काशन नियमावली, २०७३ को नियम ३८ को उपनियम (१) बमोजिम लक इनमा राखिएको र उक्त शेयरहरुको लक इन अवधि मिति २०८१/०७/११ मा समाप्त हुन लागेको व्यहोरा नियामक एव अन्य सम्बन्धित निकायहरु, लगानीकर्ता एवं सर्वसाधारण लगायत अन्य सम्पूर्ण सरोकारवालाहरुको जानकारीको लागि यो सूचना प्रकाशित गरिएको छ ।'
