काठमाडौँ । भारत विश्व टेष्ट क्रिकेट च्याम्पियनशिपको फाइनलमा पुग्ने सम्भावना कमजोर बनेको छ । न्यूजिल्याण्डविरुद्ध भइरहेको टेष्ट श्रृंखलामा कमजोर प्रदर्शन गरेसँगै भारतको सम्भावना कमजोर बन्न थालेको हो ।
अहिलेसम्म शीर्ष स्थानमा रहेको भारत न्यूजिल्याण्डसँग लगातार कमजोर प्रदर्शन गरेपछि वरीयता झर्ने पक्का भएको हो ।
पहिलो खेलमा इनिङ्स हार जोगाएको भारतले दोस्रो टेष्टमा पनि खराब प्रदर्शन गरेको छ ।
पुनेमा भइरहेको दोस्रो टेष्टको पहिलो इनिङ्स ब्याटिङ ध्वस्त भएसँगै न्यूजिल्याण्डले पकड बनाएको छ ।
न्यूजिल्याण्ड पहिलो इनिङ्समा २५९ रनमा समेटिएको थियो । डेभोन कन्वेले ७६ तथा रचिन रविन्द्रको ६५ रन बनाए । भारतका वासिंगटन सुन्दरले ७ तथा रविचन्द्रन आश्विनले ३ विकेट लिए ।
कम योगफलमा न्यूजिल्याण्डलाई रोकेपछि भारतले फराकिलो योगफल जोड्ने अपेक्षा गरिएको थियो । तर भारत भने ४५.३ ओभरमा अलआउट हुँदै १५६ रनमै अलआउट भयो ।
रविन्द्र जडेजाले सर्वाधिक ३८ रन बनाएको इनिङ्समा विराट कोहलीले १ तथा रोहित शर्माले शून्य रन जोडे ।
मिचेल सान्टनरले ७ विकेट लिए । त्यस्तै ग्लेन फिलिप्सले २ विकेट झारे ।
पहिलो इनिङ्समा भारत १०३ रनले पछि परेको छ ।
पहिलो खेलमा भारत कीर्तिमानी ४६ रनमै अलआउट भएपछि न्यूजिल्याण्ड ८ विकेटले विजयी भएको थियो ।
न्यूजिल्याण्ड तीन खेलको टेष्ट श्रृंखला खेल्न भारत आएको हो ।
