खराब लयबाट गुज्रिएको नेपालले आज स्कटल्याण्डसँग खेल्दै
हाम्रा कुरा
प्रकाशित २०८१ कार्तिक १३ मंगलबार
159
Shares
तस्बिर – फाइल ।
काठमाडौँ । नेपालले आईसीसी विश्वकप लिग २ अन्तर्गतको त्रिकोणात्मक श्रृंखला अन्तर्गत आफ्नो दोस्रो खेलमा आज स्कटल्याण्डसँग खेल्दै छ । एक दिवसीय फर्म्याटमा हुने यो खेल नेपाली समय अनुसार राति ९ः१५ बजेदेखि अमेरिकाको डालासस्थित ग्राण्ड प्रेरी स्टेडियममा शुरु हुने छ ।
यस श्रृंखलाको पहिलो खेलमा स्कटल्याण्डले अमेरिकालाई १० विकेटले पराजित गर्दै विजयी शुरुवात गरेको थियो भने नेपाल आफ्नो पहिलो खेलमा अमेरिकासँग ३ विकेटले पराजित भएको थियो ।
नेपाल र स्कटल्याण्डबीच अहिलेसम्म ६ एक दिवसीय खेल भएका छन् । जसमा नेपालले ३ र स्कटल्याण्डले ३ खेल जितेका छन् । दुवैबीच पछिल्लो खेल २०२३ को फेब्रुअरीमा भएको थियो ।
रोहित पौडेलको कप्तानीमा नेपाली टिम अमेरिकामा रहेको हो । लिग–२ मा भने नेपाल खराब लयबाट गुज्रिएको छ । नेपालले ९ खेल खेलिसकेको छ । मात्र ३ अंक बटुलेको छ ।
यसअघि नेपाल क्यानाडा गएर त्रिकोणात्मक श्रृंखला खेलेको थियो । जहाँ वर्षाले गर्दा खेल रद्द हुँदा १ अंक बटुलेको थियो भने तीन खेल हारेको थियो ।
अंक तालिका
आठ टिमले विश्वकप लिग २ खेलेकामा १२ खेलबाट क्यानाडा १६ अंकसहित शीर्ष स्थानमा रहेको छ । १० खेलबाट १४ अंकको अमेरिका दोस्रो तथा ८ खेलबाट १२ अंकसहित नेदरल्याण्ड्स तेस्रो स्थानमा रहेको छ ।
चौथो स्थानको स्कटल्याण्डको ८ खेलबाट ११ अंक रहेको छ । १० खेलबाट १० अंकको नामिबिया पाँचौँस्थानमा छ ।
८ खेलबाट ६ अंकको ओमान छैटौं स्थानमा रहँदा ९ खेलबाट ३ अंकको नेपाल सातौँ स्थानमा छ । ७ खेलबाट २ अंकको यूएई पुछारमा छ ।
