काठमाडौँ । नेपाली कांग्रेसका भ्रातृ एवं भगिनी संघहरुको हुन बाँकी महाधिवेशनको मिति अझ लम्ब्याउने योजनामा ती संघ संस्था देखिएका छन् ।
पार्टीले गत चैत मसान्तभित्र महाधिवेशन गर्न निर्देशन दिएको भए पनि सम्बन्धित संघहरुले अटेर गरेर अहिलेसम्म महाधिवेशन गरेका छैनन् ।
कांग्रेसको जारी केन्द्रीय कार्यसमिति बैठकमा केही संघले भने महाधिवेशन गर्नका लागि समय माग्दै मितिसमेत तोकेर पठाएको जानकारी दिइएको छ ।
जसअनुसार सबैभन्दा बढी विवादित नेपाल तरुण दलले भने आगामी मंसिरको अन्तिममा महाधिवेशन गर्ने गरी मिति तोकेर पठाएको छ । तरुण दलको तदर्थवादको अन्त्यका लागि पटक पटक आान्दोलन भएको छ । दुई जना अहिले पनि पार्टी कार्यालयमा आमरण अनसनमा छन् ।
त्यस्तै थारु संघले भदौ २० वा असोज २५ गते, लोकतान्त्रिक खेलकुद संघले भदौ २०–२१ गते, किसान महासंघले भदौ ३ गतेदेखि महाधिवेशन गर्ने भनी प्रस्ताव पत्र पठाएको छ ।
दलित संघ, महिला संघ र नेविसंघले भने अहिलेसम्म समयसमेत तोकेर पठाउने सकेका छैनन् ।
कांग्रेसका यी भ्रातृ एवं भगिनी संस्थाहरु वर्षौँदेखि तदर्थवादमा चलिरहेका छन् ।
