काठमाडौँ । भियतनामको उत्तर-पश्चिमी पहाडी क्षेत्रहरूमा आएको लगातारको भारी वर्षा र त्यसपछिको बाढीले कम्तीमा १० जनाको ज्यान लिएको छ। भियतनामको कृषि मन्त्रालयका अनुसार, सबैभन्दा बढी प्रभावित दिएन बिएन प्रान्तको टिया डिन्ह र सा डुङ क्षेत्रमा बाढीले १० जनाको मृत्यु र सात जनालाई घाइते बनाएको छ।
बिहीबारदेखि शनिबारसम्म परेको अविरल वर्षाले आकस्मिक बाढी र पहिरो निम्त्याएको थियो। बाढीले धेरै गाउँहरूलाई बाहिरी संसारबाट अलग बनाएको छ, जसले गर्दा उद्धार र राहत कार्यमा अवरोध आएको थियो।
शनिबार, उद्धार टोलीहरूले हेलिकप्टरको प्रयोग गरी बाढी प्रभावित क्षेत्रमा फसेका मानिसहरूसम्म पुगेर खाद्यान्न, औषधि र अन्य आवश्यक सामग्रीहरू वितरण गरेका थिए। प्रभावित मानिसहरूलाई सुरक्षित स्थानमा सारिएको छ र आइतबार साँझसम्म अधिकांश क्षेत्रमा बिजुली र सञ्चार सेवाहरू पुनः सञ्चालनमा आएका छन्।
यस बाढीले कृषि क्षेत्रमा पनि ठूलो क्षति पुर्याएको छ, जहाँ बालीनाली, चौपाया र कुखुराहरू बगाएर आर्थिक नोक्सानी भएको छ। गत महिना मात्रै सोन ला प्रान्तमा आएको यस्तै बाढीले पाँच जनाको ज्यान लिएको थियो।
भियतनाममा प्राकृतिक प्रकोपको इतिहास पुरानो छ। सन् २०२४ को सेप्टेम्बरमा आएको टाइफून यागीले ३४५ जनाको ज्यान लिएको थियो र करिब ३.३ अर्ब डलर बराबरको आर्थिक क्षति भएको थियो।
