नयाँदिल्ली । भारतीय प्रधानमन्त्री नरेन्द्र मोदीलाई अपरेशन सिन्दूरको सफलताका लागि सम्मान गरिएको छ । एनडीए संसदीय दलको बैठकमा मोदीलाई सम्मान गरिएको हो ।

मंगलबार बिहान १० बजे दिल्लीको संसद भवन परिसरमा आयोजना गरिएको कार्यक्रममा एनडीए सांसदहरूले पहलगाम आक्रमणमा अपरेशन सिन्दूर अन्तर्गत सरकारले गरेको कारबाहीको लागि प्रधानमन्त्री मोदीलाई सम्मान गरेका हुन् । 

रक्षामन्त्री राजनाथ सिंहले प्रधानमन्त्री मोदीलाई माल्यार्पण गरे। यस क्रममा सांसदहरूले ‘हर–हर महादेव’, ‘भारत माता की जय’ को नारा लगाए । 

मोदीले सांसदहरूलाई सम्बोधन गरे। उनले भने, ‘बिहारमा मतदाता सूची संशोधनको मुद्दामा जनतालाई भ्रमित पारिएको छ। देशका जनता सबै कुरा हेरिरहेका छन् ।’

भाजपा र यसका सबै सहयोगी दलका सांसदहरूले संसदीय दलको बैठकमा भाग लिएका छन् । सबै एनडीए सांसदहरूलाई बैठकमा उपस्थित हुन अनिवार्य गरिएको थियो । सांसदहरूलाई एनडीए सरकारको ११ वर्षे कार्यकालमा ‘११ वर्ष, ११ ठूला निर्णय’ शीर्षकको पुस्तक प्रदान गरिएको थियो ।

जुलाई २१ मा शुरु भएको संसदको मनसुन सत्रमा एनडीए सांसदहरूको यो पहिलो बैठक थियो। साथै जुन २०२४ मा तेस्रो पटक केन्द्रमा फर्किएपछि संसद सत्रको क्रममा एनडीए सांसदहरूको यो दोस्रो बैठक थियो।

एनडीए सांसदहरूले प्रधानमन्त्री मोदीलाई गर्जनसहित ताली बजाएर स्वागत गरे । प्रधानमन्त्रीले पनि सांसदहरूलाई हात जोडेर स्वागत गरे ।

प्रधानमन्त्री मोदी, रक्षामन्त्री राजनाथ सिंह, गृहमन्त्री अमित शाह, भाजपा अध्यक्ष जेपी नड्डा र सबै एनडीए सांसदहरू संसदीय दलको बैठकमा उपस्थित भए।

के हो अपरेशन सिन्दूर ?
गत २२ अप्रिलमा जम्मू कश्मीरको पहलगाममा भएको आतंकवादी हमलामा एक नेपालीसहित २६ जनाको मृत्यु भएको थियो । यसको जवाफमा भारतले मे ७ मा बिहान १ः३० बजे अपरेशन सिन्दूर सुरु गर्‍यो । 

सेनाले राति १ः५१ बजे सामाजिक सञ्जालमा आधिकारिक विज्ञप्ति जारी गर्दै भन्यो, ‘न्याय भएको छ।’ 

यससँगै अपरेशन सिन्दूरको तस्बिर पनि सेयर गरिएको थियो ।

यसअन्तर्गत भारतले पाकिस्तानमा रहेका ९ आतंकवादी लुकेका ठाउँहरू ध्वस्त पारेको थियो । मे १० सम्म चलेको द्वन्द्वमा भारतले पाकिस्तानका धेरै एयरबेसमा पनि आक्रमण गरेको थियो । 

यसमा एयरबेसका धावनमार्ग, ह्याङ्गर र भवनहरू क्षतिग्रस्त भएका थिए । यसमा सरगोधा, नूर खान (चकलाला), भोलारी, ज्याकोबाबाद, सुक्कुर र रहिम यार खान एयरबेसहरू समावेश छन् ।