काठमाडौँ । नेपाली कांग्रेसको केन्द्रीय कार्यसमितिको बैठक आजदेखि बस्दैछ । बैठक पार्टी मुख्यालय बीपीनगर सानेपामा बस्न लागेको हो । 

बैठक दिउँसो १ बजेदेखि बस्ने पार्टी कार्यालयले जारी गरेको विज्ञप्तिमा उल्लेख छ । यसअघि बैठक गत आइतबार बस्ने भनिएको थियो । 

तर पार्टीभित्र जेन–जीका माग सम्बोधन गर्नका लागि नियमित महाधिवेशन वा विशेष महाधिवेशन गरेर नेतृत्व परिवर्तन गरी फागुन २१ को प्रतिनिधि सभा निर्वाचनमा होमिनुपर्ने माग बढेसंगै संस्थापन हच्किएको छ । 

अहिले अधिकांश जिल्लाबाट महाधिवेशनका लागि हस्ताक्षर भइरहेको छ । गत भदौ २३ र २४ गतेको जेन–जी आन्दोलन र त्यसले गरेको परिवर्तनलाई आत्मसात् गर्दै अगाडि बढ्नुपर्ने जताततै व्याप्त रहेको छ । 

हरेक दलमा नेतृत्व परिवर्तनको दबाब रहेको छ । कांग्रेसको १४ औँ महाधिवेशन २०७८ को मंसिरमा भएकाले नियमित महाधिवेशन नै आगामी मंसिरमा गर्न सकिन्छ । 

संस्थापनले त्यसलाई लम्ब्याउन खोजिरहेको छ । यता संस्थापन इतर पक्षले भने नियमित महाधिवेशन गर्न सकिँदैन भने विशेष महाधिवेशन गरेरै भए पनि नेतृत्व परिवर्तन गर्न माग गरेका छन् । 

बैठकमा अहिलेको परिवर्तनबारेमसेत गम्भीर छलफल गरी कांग्रेसले सोही अनुसार आफ्नो राजनीतिक रणनीति तयार गर्नेछ ।

प्रतिक्षा देउवा दम्पतीको 
सभापति शेरबहादुर देउवा अझै सार्वजनिक भएका छैनन् । यसअघि बसेका कांग्रेस बैठकहरूमा उपसभापति पूर्णबहादुर खड्काले सभापतित्व गर्दैै आएका छन् । 

भदौ २४ गते जेन–जीको हिंश्रक आन्दोलनले देउवा निवास बूढानीलकण्ठमा आगो लगाउनुका साथै देउवा दम्पतीलाई दुर्व्यवहार गरी पिटपाट गरेको थियो । 

सेनाले उद्धार गरेर सैनिक अस्पतालमा भर्ना गरेको थियो । त्यसयता देउवा दम्पती (पत्नी आरजू राणा देउवा) सार्वजनिक भएका छैनन् । 

उनीहरू आजको बैठकमा उपस्थित हुने बताइएको छ । भदौ २४ गते निवास जलाइँदा थुप्रै रुपैयाँ पनि जलाइएको थियो । 

उक्त पैसाका बारेमा पनि देउवा दम्पतीले जवाफ दिने नै छन् । यता अन्तरिम सरकारले भने उक्त रकमका बारेमा अनुसन्धान थालिसकेको जनाएको छ । 

त्यसयता देउवाप्रति दुई थरी धारणा बाहिर आएको छ । पहिलो त उनी चाहेका भए माओवादी केन्द्रका संयोजक पुष्पकमल दाहाल प्रचण्ड जस्तै अघिल्लै दिन सेनाको शरणमा जान सक्थे । 

सेनाले २४ गते नै उद्धार गर्न खोज्दा आफू कतै नजाने भन्दै आफूले गल्ती नगरेकाले जनताले आफूलाई केही नगर्ने बताएको विषय चर्चामा आएको थियो । 

उनले सो बेलामा जनताले मार्छन् भने मर्न तयार रहेकोसमेत उल्लेख गरेको बाहिर सार्वजनिक भएको थियो । उनको यो भनाइपछि देउवाप्रतिको आस्था नेपाली जनतामा बढेको पाइएको थियो । 

यद्यपि यो विषयमा देउवाले अहिलेसम्म बोलेका छैनन् । उनले सम्भवतः यो केन्द्रीय समिति बैठकमा सम्बोधन गर्ने नै छन् । 

त्यस्तै दोस्रो विषय भने उनको घरमा रहेको अथाह रकम हो । त्यो रकम जलेको र जनताले लुटेर लगेका भिडियोहरू सामाजिक सञ्जालमा छ्याप्छयाप्ति भएपछि भने देउवा दम्पतीको शाख स्वात्तै घटेको थियो । 

यो विषयमा पनि देउवा दम्पतीले जानकारी दिने अपेक्षा गरिएको छ । 

देउवा सम्मानित अवतरणको प्रतिक्षामा
देउवाले आफूमाथि दुर्व्यवहार भएपछि सम्मानित तरिकाले पार्टी नेतृत्व छाड्न खोजेको बुझिएको छ । 

यद्यपि अस्पताल बसाइपछि उनी कहिले बाहिर आए भन्ने जानकारी नदिएपछि उनीमाथि शंका उब्जियो । उनी पक्षका नेताहरूले सभापति मर्माहित भएका बेलामा पनि विशेष महाधिवेशन माग्नु मूर्खता हो समेत भन्न भ्याए । 

तर समय बलबान भएकाले कांग्रेसको शाख जोगाउने हो भने नेतृत्व परिवर्तन अहिलेको महत्वपूर्ण विषय भएकोसमेत बताइँदै आइएको छ । 

देउवाले पनि पछिल्लो समय आफूले सहज वातावरण पाए छाड्ने र महाधिवेशनको तयारी गर्ने जनाएको बुझिन्छ । 

आजको बैठकपछि माहोल कता जान्छ सोही अनुसार हुने पनि बुझिएको छ । 

देउवा तेस्रो पटक सभापति हुन खोजेका हैनन् । तर एमालेसँग सत्ता गठबन्धन गर्दा चुनावी सरकारको नेतृत्व आफूले गर्ने आकांक्षामा पार्टीको महाधिवेशन पछाडि धकेल्न खोजेका थिए । 

अब सत्ता नै परिवर्तन भइसकेपछि देउवाको यो बहाना पनि सकिएकाले विशेष महाधिवेशन वा नियमित महाधिवेशनको विकल्प देखिँदैन ।