काठमाडौँ। अफगानिस्तान र पाकिस्तानबीच पछिल्ला दिनमा भएको घातक सीमापार झडपमा दर्जनौँ सैनिक र सर्वसाधारणको ज्यान गएपछि दुई देशबीच बिहीबार ४८ घण्टे युद्धविराम लागू भएको छ। पाकिस्तानले 'रचनात्मक वार्तामार्फत सकारात्मक समाधान खोज्ने' उद्देश्यले बुधबार साँझदेखि युद्धविराम घोषणा गरेको हो।

युद्धविराम लागू भएसँगै हालैका झडपहरूको केन्द्र रहेको दक्षिणी सहर स्पिन बोल्दाक मा जनजीवन सामान्य बन्दै गएको छ; पसलहरू खुलेका छन् र बासिन्दाहरू घर फर्कन थालेका छन्। यद्यपि, युद्धविराम सुरु भएपछि पनि सीमामा केही क्षण गोलीबारी सुनिएको एएफपी पत्रकारहरूले जनाएका छन्। संयुक्त राष्ट्रसङ्घका मानवअधिकार प्रमुख भोल्कर टर्कले युद्धविरामको स्वागत गर्दै स्थायी शान्तिका लागि प्रतिबद्ध रहन दुवै पक्षलाई आग्रह गरेका छन्।

युद्धविराम घोषणा हुनुअघि अफगान राजधानी काबुलमा भएको पछिल्लो विस्फोटले भने विवाद सिर्जना गरेको छ। अफगान सरकारले उक्त घटनालाई 'तेल ट्याङ्कर र जेनेरेटरको विस्फोटबाट भएको दुर्घटना' बताएको भए पनि एकजना वरिष्ठ तालिबान अधिकारीले एएफपीसँग कुरा गर्दै उक्त विस्फोट 'इस्लामाबादद्वारा नियोजित आक्रमण' भएको र 'सर्वसाधारणलाई लक्षित गरिएको' दाबी गरेका छन्।

यसको विपरीत, पाकिस्तानी सुरक्षास्रोतहरूले सेनाले काबुलमा ‘सटीक आक्रमण’ गरी सशस्त्र समूहहरूलाई लक्षित गरेको र दक्षिणी कान्दाहार प्रान्तमा रहेको अफगान तालिबानको आश्रयस्थलमा पनि प्रहार गरेको बताएका छन्। गत हप्ता काबुल र दक्षिणपूर्वी अफगानिस्तानमा भएका शृङ्खलाबद्ध विस्फोटपछि हिंसा तीव्र भएको थियो, जसका लागि तालिबान सरकारले पाकिस्तान जिम्मेवार रहेको आरोप लगाएको थियो।

बुधबार काबुलमा भएको विस्फोटमा इटालियन गैर–सरकारी संस्था इमर्जेन्सीका अनुसार कम्तीमा पाँच जनाको मृत्यु र ३५ जना घाइते भएका छन्। घाइतेमध्ये १० जनाको अवस्था अत्यन्त गम्भीर रहेको जनाइएको छ।

यस महिनाको घातक हिंसाले अफगानिस्तान र पाकिस्तानबीचको सम्बन्ध पुनः तनावपूर्ण बनाएको छ। इस्लामाबादले आफ्नो भूमिमा भएका उग्रवादी आक्रमणहरूका लागि अफगानिस्तानलाई दोष दिँदै र अफगान सरकारमाथि 'पाकिस्तानी तालिबान (टिटिपी)' लाई शरण दिएको आरोप लगाउँदै आएको छ, जसलाई काबुलले अस्वीकार गर्दै आएको छ। यी घटनाहरू तालिबानका वरिष्ठ कूटनीतिज्ञले पाकिस्तानको शत्रु राष्ट्र भारतको भ्रमण गरेको बेला भएकाले काबुल र इस्लामाबादबीचको अविश्वास अझ बढेको मानिएको छ।