कतार आक्रमणपछि ट्रम्पका वार्ताकारले 'धोका महसुस' गरेको भनाइ
इजरायलको कार्यले युद्धविराम वार्तामा प्रभाव परेको खुलासा
हाम्रा कुरा
प्रकाशित २०८२ कार्तिक २ आइतबार
2.5k
Shares
काठमाडौँ। अमेरिकी राष्ट्रपति डोनाल्ड ट्रम्पका मध्यपूर्वका प्रमुख वार्ताकार स्टिभ विटकोफले गत महिना कतारको दोहामा हमासका वार्ताकारहरूलाई लक्षित गरी इजरायलले आक्रमण गर्दा आफूले 'विश्वासघात' भएको महसुस गरेको बताएका छन्।
इजरायल र हमासबीच गाजा युद्धविराम सम्झौताको मध्यस्थतामा विटकोफसँग काम गरेका ट्रम्पका ज्वाइँ जारेड कुश्नरसँग सीबीएसमा दिएको अन्तर्वार्तामा उनले सेप्टेम्बर ९ मा दोहामा भएको आक्रमणको बारेमा बिहान मात्रै थाहा पाएको बताएका छन्। कतार अमेरिकाको एक प्रमुख सहयोगी हो र गाजा युद्ध अन्त्यको प्रयासमा मध्यस्थकर्ताको रूपमा काम गरिरहेको थियो।
सीबीएस समाचार कार्यक्रम ‘सिक्स्टी मिनेट’ लाई दिएको अन्तर्वार्ताको शुक्रबार सार्वजनिक एक अंशमा विटकोफले भने, "मलाई लाग्छ, जेरेड र म दुवैले कतारमा आक्रमण हुनुलाई थोरै धोका महसुस गर्यौं।"
उनका अनुसार, यस आक्रमणले युद्धविराम पहलमा प्रत्यक्ष प्रभाव पारेको थियो, किनकि इजिप्ट र तुर्कहरूजस्तै कतारीहरू वार्ताका लागि महत्वपूर्ण थिए। विटकोफले भने, "हामीले कतारीमाथिको विश्वास गुमाएका थियौँ। यसैले हमासका अधिकारी भूमिगत भए र कतारविना उनीहरूलाई प्राप्त गर्न धेरै गाह्रो थियो।"
त्यस समयमा, हमासको सन् २०२३ अक्टोबर ७ मा इजरायलमा भएको आक्रमणबाट सुरु भएको विनाशकारी गाजा पट्टीमा लडाइँ अन्त्य गर्न अप्रत्यक्ष वार्ता प्रक्रिया रोकिएको थियो।
सामाजिक सञ्जालमा ट्रम्पले दोहामा हवाई आक्रमण गर्ने निर्णय प्रधानमन्त्री बेन्जामिन नेतान्याहुबाट आएको बताएका थिए। यद्यपि, इजरायल र हमासले अन्ततः ट्रम्पले प्रस्तुत गरेको २० बुँदे शान्ति योजनालाई स्वीकार गरे। यसै महिना ह्वाइट हाउस भ्रमणका क्रममा ट्रम्पको दबाबमा नेतान्याहूले कतारका प्रधानमन्त्रीलाई फोन गरी दोहा आक्रमणका लागि माफी माग्न बाध्य हुनुपरेको थियो।
