काठमाडौँ ।  ‘मोन्था’ चक्रवातले शनिबार बिहानसम्म देशका अधिकांश भागमा वर्षा हुने भएको छ । जल तथा मौसम पूर्वानुमान महाशाखाका अनुसार कर्णाली र सुदूरपश्चिम प्रदेशमा छिटपुट, अन्य प्रदेशमा मध्यम वर्षा हुने तथा शनिबार बिहानदेखि मात्र मौसम सुधार आउने छ ।

जल तथा मौसम विज्ञान विभागकी प्रवक्ता विभूति पोखरेलले आगामी २४ घण्टा काठमाडौँ उपत्यकाका साथै आसपासका क्षेत्रमा वर्षा हुने जानकारी दिँदै सबै स्थानमा निरन्तर वर्षा भने नहुने बताइन् । 

आगामी २४ घण्टामा कोशी, बागमती, गण्डकी र कर्णाली प्रदेशका उच्च पहाडी तथा हिमाली भेगमा एक दुई ठाउँमा भारी हिमपातको सम्भावना रहेको प्रवक्ता पोखरेलले जानकारी दिइन् । 

 अहिले देशका विभिन्न भागमा पश्चिमी वायु र बङ्गालको खाडीमा बनेको ‘मोन्था’ चक्रवातको प्रभाव परेकाले उपत्यकासहित विभिन्न स्थानमा बिहानैदेखि झरी परेको छ । 

पश्चिमी वायुको सक्रिय प्रभाव र अरब सागरमा बनेको न्यून चापीय प्रणालीका साथै बङ्गालको खाडीमा विकसित चक्रवात ‘मोन्था’ को आंशिक प्रभाव देशैभरपरेको जल तथा मौसम पूर्वानुमान महाशाखाले जानकारी दिएको छ ।

 कोशी, मधेस, बागमती, गण्डकी र लुम्बिनी प्रदेशसहितका पहाडी भू–भागमा आज दिउँसो अधिकांश समय बादल लाग्ने छ भने तराईका भू–भागमा सामान्य बदली रहनेछ । 

कोशी, मधेश र बागमती प्रदेशका धेरै स्थानहरूमा मध्यम वर्षा हुने सम्भावना छ । गण्डकी र लुम्बिनी प्रदेशका पहाडी तथा हिमाली क्षेत्रका केही स्थानमा वर्षा र हिमपातको सम्भावना रहेको महाशाखाले जनाएको छ ।

त्यस्तै कर्णाली र सुदूरपश्चिम प्रदेशका केही स्थानमा हल्का वर्षा हुने विभागको पूर्वानुमान छ । आज उपत्यकामा बिहानैदेखि हल्का वर्षा हुँदा जनजीवन केही प्रभावित भएको छ ।

आजभन्दा भोलि बढी पानी पर्ने पनि जनाइएको छ । मौसमविद्हरुका अनुसार आज धेरैजसो ठाउँमा हल्का वर्षा हुनेछ । केही स्थानमा मात्रै भारी वर्षा हुनेछ । काठमाडौंमा आज हल्का वर्षा हुनेछ । भोलि भने काठमाडौँका केही ठाउँमा भारी वर्षा हुने अनुमान र्माैसमविद्हरुको छ । 

देशैभर आजभन्दा ‘मोन्था’ चक्रवातको असर भोलि धेरै देखिनेछ । त्यसैले आजभन्दा भोलि धेरै वर्षाको सम्भावना छ । आज दिउँसोबाट ‘मोन्था’को प्रभाव केही बढ्दै जाने र रातिबाट थप बढ्ने उनको भनाइ छ । लुम्बिनी प्रदेशमा पनि रातिबाट यसको प्रभाव बढी देखिनेछ । प्रभाव बढ्दै जाँदा वर्षा पनि ठूलो हुँदै जानेछ । 

राष्ट्रिय विपद् जोखिम न्यूनीकरण तथा व्यवस्थापन प्राधिकरणले आज र भोलि ४४ जिल्लामा उच्च सतर्कता अपनाउनु पर्ने र दश जिल्लामा निरन्तर मौसमबारे जानकारी लिएर बस्न आग्रह गरेको छ । 

प्राधिकरणले आज बिहानदेखि भोलि बिहानसम्म कोशी, बागमती र गण्डकी प्रदेशका उच्च पहाडी तथा हिमाली भूभागका एक–दुई स्थानमा भारी हिमपातको सम्भावना रहेको बताएको छ । 

कोशी, मधेस, बागमती र लुम्बिनी प्रदेशका एक–दुई स्थानमा भारी वर्षाको पनि सम्भावना रहेकाले आवश्यक सतर्कता अपनाउन प्राधिकरणले आग्रह गरेको छ । 

मोन्था शनिबार दिउँसोदेखि बाहिरिने महाशाखाले जनाएको छ । त्यसपछि अवस्था सामान्य हुनेछ ।

कात्तिकमा वर्षा भएसँगै चिसोसमेत ह्वात्तै बढेको छ ।