चक्रवात 'मोन्था' को प्रभाव: कोशी प्रदेशमा धानबालीमा क्षति
हाम्रा कुरा
प्रकाशित २०८२ कार्तिक १४ शुक्रबार
1.2k
Shares
विराटनगर। बङ्गालको खाडीमा विकसित चक्रवात 'मोन्था' को प्रभावका कारण परेको बेमौसमी अविरल वर्षाले कोशी प्रदेशसहित पूर्वी नेपालभर जनजीवन अस्तव्यस्त बनाएको छ। यस असामान्य वर्षाले किसानहरूको भर्खर थन्काउने बेला पुगेको धानबाली र तोरीबालीमा ठूलो क्षति पुर्याएको छ।
तराईदेखि हिमालसम्मको क्षेत्र प्रभावित हुँदा प्रदेशका सडक, विद्यालय र बाली सबै क्षेत्रमा क्षति पुगेको छ। सुनसरी, मोरङ, झापा, उदयपुरसहित विभिन्न स्थानमा पानीले धानबाली डुबाएको किसानहरूले बताएका छन्।
वर्षाको असरले प्रदेशका कतिपय स्थानीय तहहरूले विद्यालय बन्द गर्नुपरेको छ। इटहरी उपमहानगरपालिकाले सुरक्षा र यातायात जोखिमलाई मध्यनजर गर्दै विद्यालय अस्थायी रूपमा बन्द गर्ने निर्णय गरेको छ।
तराईका अधिकांश भूभाग जलमग्न बनेका छन् भने नदीनालामा पानीको बहाव तीव्र बनेको छ। मेची राजमार्गसहितका कतिपय सडक खण्डमा पहिरोका कारण आवागमन अवरुद्ध भएको छ, भने उत्तरी पहाडी क्षेत्रमा अत्यधिक हिमपातका कारण जनजीवन कठिन बनिरहेको छ।
कोशी प्रदेशका आन्तरिक मामिला तथा कानुन मन्त्री रेवती रमण भण्डारीले डिजिटल म्यापअनुसार प्रभावित क्षेत्र पहिचान गरी सुरक्षाकर्मीमार्फत उद्धार र राहतका काम अघि बढाइएको जानकारी दिएका छन्।
उनका अनुसार स्थानीय सरकारमार्फत तत्कालीन राहत र उद्धारको कार्य सुरु भइसकेको छ। मौसमविद्हरूले वर्षा भोलीसम्मै जारी रहने अनुमान गरेका छन्, जसले किसानको चिन्ता झन् बढाएको छ।
