काठमाडौँ। इजरायली नेताहरूले अष्ट्रेलियाको सिड्नीमा हनुक्का उत्सवलाई लक्षित गरी आइतबार भएको गोलीबारीको कडा निन्दा गरेका छन्। यस घटनामा ११ जनाको ज्यान गएको थियो। घटनापछि इजरायली नेतृत्वले अष्ट्रेलिया सरकारले यहुदी विरोध विरुद्ध प्रभावकारी कदम चाल्न असफल भएको आरोप लगाएको छ।

प्रधानमन्त्री बेन्जामिन नेतान्याहुले क्यानबेराले लामो समयदेखि यहुदी विरोधी भावनालाई बढ्न दिएको आरोप लगाए। उनले प्रधानमन्त्री एन्थोनी अल्बानिजलाई अगस्टमा लेखेको पत्र स्मरण गर्दै "तपाईंहरूको नीतिले यहुदी विरोधको आगोमा तेल खन्याइरहेको छ" भनेका थिए। दक्षिणी इजरायलमा टेलिभिजनमार्फत सम्बोधन गर्दै नेतान्याहुले "नेताहरू मौन बस्दा यहुदी विरोध क्यान्सरझैँ फैलिन्छ" भने।

इजरायली विदेशमन्त्री गिडियोन सारले आफ्ना अष्ट्रेलियाली समकक्षी पेनी वोङसँग फोनवार्ता गर्दै अष्ट्रेलियामा यहुदी विरोध बढिरहेको भन्दै त्यसविरुद्ध कडा कारबाही गर्न आग्रह गरेका छन्। उनले सामाजिक सञ्जालमा अक्टोबर ७ पछि अष्ट्रेलियामा इजरायल र यहुदी समुदायविरुद्ध हिंसात्मक उक्साहट बढेको दाबी गर्दै केही प्रदर्शनमा सुनिने नाराहरूप्रति गम्भीर चिन्ता व्यक्त गरे।

राष्ट्रपति आइज्याक हर्जोगले बोन्डी समुद्र तटमा हनुक्काको पहिलो मैनबत्ती बाल्न भेला भएका यहुदीहरूमाथि भएको आक्रमणलाई 'अत्यन्तै क्रूर' भनेर निन्दा गरे। जेरुसेलममा आयोजित एक कार्यक्रममा उनले अष्ट्रेलियालाई आफ्नो समाजलाई सताइरहेको 'यहुदी विरोधको विशाल लहर' विरुद्ध दृढतापूर्वक उभिन आह्वान गरे।

गोलीबारी सिड्नीको प्रसिद्ध बोन्डी समुद्र तटमा हनुक्काको पहिलो रातको अवसरमा आयोजना गरिएको ‘हनुक्का बाय द सी’ कार्यक्रममा भएको थियो। अष्ट्रेलियाली प्रधानमन्त्री एन्थोनी अल्बानिजले घटनालाई 'दुष्टता, यहुदी विरोध र आतङ्कवादको कार्य' भन्दै निन्दा गरे र 'यहुदी अष्ट्रेलियालीमाथि भएको आक्रमण प्रत्येक अष्ट्रेलियालीमाथिको आक्रमण हो' भने।

यसैबीच राष्ट्रिय सुरक्षामन्त्री इटामार बेन गभिरले अष्ट्रेलियाली सरकारमाथि यहुदीविरुद्धको आतङ्कवादलाई वैधानिकता दिएको आरोप लगाए भने विपक्षी नेता यायर लापिदले विश्वका विभिन्न सहरमा यहुदी समुदाय लक्षित घातक आक्रमण बढ्दै गएकोप्रति गहिरो चिन्ता व्यक्त गर्दै तत्काल र निर्णायक अन्तर्राष्ट्रिय कदम आवश्यक रहेको बताए।