आजदेखि देशभर मौसम फेरबदल: सुदूरपश्चिम र कर्णालीमा वर्षा र हिमपातको सम्भावना
हाम्रा कुरा
प्रकाशित २०८२ माघ ९ शुक्रबार
806
Shares
काठमाडौँ । नेपालमा पश्चिमी वायुको नयाँ प्रणाली सक्रिय भएसँगै आज माघ ९ गते देशभरको मौसममा उल्लेख्य बदलाव आउने जल तथा मौसम पूर्वानुमान महाशाखाले जनाएको छ। विशेष गरी सुदूरपश्चिम र कर्णाली प्रदेशमा आज दिउँसोदेखि नै साधारणतया बदली भई वर्षा र हिमपातको प्रक्रिया सुरु हुनेछ। तराईका अधिकांश भू-भागमा भने दिउँसोको समयमा मौसम मुख्यतया सफा रहने भए पनि पहाडी भेगमा आंशिक बदली रहने देखिन्छ।
महाशाखाका अनुसार आज रातिबाट मौसमी प्रणाली थप शक्तिशाली हुनेछ। बागमती, गण्डकी, लुम्बिनी, कर्णाली र सुदूरपश्चिम प्रदेशमा मेघगर्जन र चट्याङसहित मध्यम वर्षाको सम्भावना रहेको छ। गण्डकी, लुम्बिनी, कर्णाली र सुदूरपश्चिमका एक-दुई स्थानमा असिनासहितको वर्षा हुन सक्ने भएकाले सतर्क रहन आग्रह गरिएको छ। यस्तै, उच्च पहाडी तथा हिमाली क्षेत्रमा मध्यम हिमपात हुने प्रक्षेपण गरिएको छ।
वर्षा र हिमपातका कारण चिसो बढ्ने तथा हवाई र सडक यातायात, पर्यटन एवं स्वास्थ्य सेवामा समेत असर पर्न सक्ने विज्ञहरूको भनाइ छ। महाशाखाले दैनिक जनजीवन प्रभावित हुन सक्ने भन्दै आवश्यक पूर्वतयारी र सतर्कता अपनाउन सबैमा अनुरोध गरेको छ। यो हिउँदे वर्षाले सुक्खापन कम गर्न मद्दत गरे पनि यात्रा र ढुवानीका क्षेत्रमा भने चुनौती थप्न सक्ने देखिएको छ।
