कांग्रेस संसदीय दलको निर्णय - जनपक्षीय काममा समर्थन, विधि मिचिए खबरदारी
हाम्रा कुरा
प्रकाशित २०८२ चैत १९ बिहिबार
648
Shares
काठमाडौँ । नेपाली कांग्रेस संसदीय दलले सरकारले ल्याउने जनपक्षीय र राष्ट्रहितका कामहरूलाई समर्थन गर्ने तर विधि र कानुन मिचिएमा कडा रूपमा सचेत गराउने निर्णय गरेको छ। नयाँ निर्वाचित संसद्को पहिलो संयुक्त संसदीय दलको बैठकपछि राष्ट्रिय सभाका सांसद कृष्णबहादुर रोकायले सञ्चारकर्मीहरूलाई यस्तो जानकारी दिएका हुन्। सिंहदरबारमा बसेको बैठकमा संसद्मा पार्टीको भूमिकालाई कसरी प्रभावकारी र सक्रिय बनाउने भन्ने विषयमा गहन छलफल भएको छ।
बैठकले संसद्मा सांसदहरूको उपस्थितिलाई सशक्त बनाउने र जनताका जल्दाबल्दा समस्याहरूलाई प्राथमिकताका साथ उठाउने साझा धारणा बनाएको छ। सांसद रोकायका अनुसार कांग्रेसले सरकारका हरेक कदमलाई नजिकबाट नियाल्नेछ। यदि सरकारले कतै विधि र प्रक्रिया मिचेर देश र जनतालाई अहित हुने काम गरेमा संसद्मा कांग्रेसले रचनात्मक तर कडा प्रतिपक्षीय भूमिका निर्वाह गर्दै सरकारलाई खबरदारी गर्नेछ।
नयाँ संसद्को कार्यकाल सुरु भएसँगै बसेको यो पहिलो संयुक्त बैठकले आगामी दिनमा सदनमा खेल्नुपर्ने भूमिका र उठाउनुपर्ने एजेन्डाहरूका बारेमा स्पष्ट मार्गचित्र तय गरेको छ। "जनता र देशको पक्षमा ल्याउने कामहरूलाई हामी समर्थन गरेर जान्छौँ, तर विधिलाई मिच्ने ढङ्गले काम भएमा हामी चुप लागेर बस्दैनौँ, सचेत गराउँछौँ," रोकायले बैठकको निष्कर्ष सुनाउँदै भने।
