काठमाडौँ । अमेरिका, क्यानडा र मेक्सिकोमा संयुक्त रूपमा जारी फिफा विश्वकप २०२६ मा खेलाडी निष्कासन (रातो कार्ड) को सङ्ख्या उल्लेखनीय रूपमा बढेको छ। प्रतियोगिता अझै प्रारम्भिक चरणमै रहेका बेला हालसम्म देखाइएका रातो कार्डको सङ्ख्या ८ पुगिसकेको छ। यो सङ्ख्या सन् २०१८ को रसिया विश्वकप र २०२२ को कतार विश्वकपमा देखाइएका कुल रातो कार्ड (४–४ वटा) को संयुक्त योगफलसरह हो।

फक्स स्पोर्ट्सका अनुसार आइतबार राति समूह ‘सी’ अन्तर्गत बेल्जियम र इरानबीच भएको खेलमा बेल्जियमका डिफेन्डर नाथन न्गोयले ६६औँ मिनेटमा सिधै रातो कार्ड पाएका थिए। इरानका मेहदी तात्सुमीलाई स्पष्ट गोल गर्ने अवसरबाट रोक्ने क्रममा फउल गरेपछि न्गोय मैदानबाट बाहिरिएका हुन्। त्यसपछि बेल्जियम १० खेलाडीमा सीमित भए पनि सो खेल गोलरहित बराबरीमा सकिएको थियो।

यस विश्वकपमा हालसम्म देखाइएका ८ रातो कार्डमध्ये ६ वटा रेफ्रीले सिधै दिएका छन्। यसले प्रतियोगिताको उच्च प्रतिस्पर्धात्मकता, रेफ्रीहरूको कडा नियम पालना र खेलाडीहरूको आक्रामक शैलीलाई प्रतिबिम्बित गरेको खेल विश्लेषकहरूको भनाइ छ।

विश्वकप इतिहासमा एकै संस्करणमा सबैभन्दा धेरै २१ वटा रातो कार्ड देखाइएको कीर्तिमान सन् २००६ को जर्मनी विश्वकपमा बनेको थियो, जसमा ९ वटा सिधै रातो कार्ड थिए। त्यसपछि सन् २०१० को दक्षिण अफ्रिका विश्वकपमा १७ तथा सन् २०१४ को ब्राजिल विश्वकपमा १० खेलाडी निष्कासित भएका थिए। यसपालिको लय हेर्दा २०१४ को कीर्तिमान तत्कालै तोडिने निश्चित देखिएको छ।

यस विश्वकपमा रातो कार्डको सामना गर्नेमा धेरै चर्चित खेलाडीहरू समेत परेका छन्। पाराग्वेका स्टार मिगुएल अल्मिरोनलाई टर्कीविरुद्धको खेलमा भिडियो सहायक रेफ्री (भीएआर) को कडा समीक्षापछि मैदानबाट बाहिर पठाइएको थियो। त्यस्तै, क्यानडाविरुद्धको खेलमा कतारका दुई खेलाडी असिम मादिबो र मोआज अहमद निष्कासित भएका थिए।

यसैगरी, बोस्निया एन्ड हर्जेगोभिनाका तारिक मुहरामोभिचले स्विट्जरल्यान्डका स्ट्राइकर ब्रेल एम्बोलोलाई पेनाल्टी क्षेत्र नजिकै गोल गर्नबाट वञ्चित गरेपछि रातो कार्ड पाएका थिए भने जमैकाका वार हन्ट दक्षिण अफ्रिकाविरुद्धको खेलको अन्तिम समयमा मैदानबाट निकालिएका थिए।

प्रतियोगितामा दक्षिण अफ्रिकी टोलीले सबैभन्दा बढी अनुशासनको समस्या भोगेको छ। मेक्सिकोविरुद्धको उद्घाटन खेलमै दक्षिण अफ्रिकाका थेम्बा ज्वाने र स्पेफेलो सिथोले दुवैले रातो कार्ड खाँदै मैदान छाड्नुपरेको थियो।

प्रतियोगिताका अझै धेरै खेलहरू बाँकी नै रहेकाले रातो कार्डको यो सङ्ख्या आगामी दिनमा थप बढ्ने निश्चित छ। यसले सन् २०१० को १७ रातो कार्डको कीर्तिमानलाई समेत चुनौती दिने हो कि भन्ने विषयमा अहिले विश्व फुटबल वृत्तमा निकै चासो र बहस सुरु भएको छ।