काठमाडौँ । बेल्जियम विश्वकप फुटबलको प्रिक्वार्टरफाइनलमा प्रवेश गरेको छ । आज बिहान भएको अन्तिम ३२ को खेलमा सेनेगललाई निराश पार्दै बेल्जियम अन्तिम १६ मा पुगेको हो ।
बेल्जियमले खेल ३–२ ले जित्यो । निर्धारित ९० मिनेटको खेलमा २–२ गोलको बराबरी तथा थपिएको ३० मिनेटमा बेल्जियमले एक गोल गरेपछि बेल्जियमले बाजी मार्यो ।
खेलमा सेनेगलले २–० ले अग्रता लिएर पनि जितमा परिणत गर्न सकेन । अन्तिम चार मिनेट सम्हालिन नसक्दा निर्धारित ९० मिनेटमा २–२ को बराबरी हुन पुग्यो ।
खेलको २५ औँ मिनेटमा हबिब डियाराको गोलमा सेनेगलले प्रारम्भिक अग्रता लियो । साडियो मानेको पासमा डियाराले गोल गरेका हुन् ।
मध्यान्तरसम्म १–० ले अग्रता लिएको सेनेगलले ५१ औँ मिनेटमा अग्रतालाई दोब्बर गर्यो । स्माइला सारले मौसा नियाखाटेको पासमा गोल गरे ।
तर सेनेगल अन्तिम चार मिनेट सम्हालिन नसक्दा निर्धारित ९० मिनेटमा बेल्जियमले दुई गोल गर्यो ।
८६ औँ मिनेटमा रोमेलु लुकाकूले गोल गर्दै २–० को स्थितिमा ल्याए । थोमस मुनियरको पासमा लुकाकूले गोल गरेका हुन् ।
८९ औँ मिनेटमा लियान्द्रो त्रोसार्दको पासमा यौरी टाइलेमान्सले हेड गोल गर्दै बेल्जियमलाई २–२ को बराबरीमा ल्याए ।
त्यसपछि थपिएको ३० मिनेटको खेलको पनि इन्जुरी समयमा गोल गर्दै बेल्जियम विजयी भयो ।
खेलमा भीएआरको निर्णयअनुसार सेनेगलका खेलाडीले डी बक्स क्षेत्रभित्र बेल्जियमका खेलाडीलाई लडाएपछि पाएको पेनाल्टीलाई गोलमा परिणत गरे ।
इन्जुरी समयको पाँचौँ मिनेटमा पाएको पेनाल्टीलाई टाइलेमान्सले गोलमा परिणत गर्दै बेल्जियमलाई ३–२ ले जिताए ।
विश्वकपको इतिहासमै यो सबैभन्दा ढिला भएको गोल हो । यो खेलमा निर्धारित ९० मिनेटमा ८ मिनेट र थपिएको ३० मिनेटमा ११ मिनेट इन्जुरी समयको खेल खेलाइएको थियो ।
