सार्वजनिक खरिद ऐन संशोधनपछि विकास निर्माणले गति लिन्छ [भिडियो]
हाम्रा कुरा
प्रकाशित २०८३ साउन १० आइतबार
203
Shares
रामेछाप। भौतिक पूर्वाधारमन्त्री सुनिल लम्सालले सार्वजनिक खरिद ऐनका कारण विगतमा विकास निर्माणका काम प्रभावित भएको बताउँदै ऐन संशोधनपछि विकास आयोजनाले गति लिने विश्वास व्यक्त गरेका छन्।
आइतबार दोलखामा आयोजित कार्यकर्ता भेटघाट कार्यक्रममा बोल्दै मन्त्री लम्सालले सरकारले सार्वजनिक खरिद ऐन संशोधन गरिसकेको उल्लेख गर्दै अब विकास निर्माणमा देखिएका कानुनी तथा प्रक्रियागत समस्या क्रमशः समाधान हुँदै जाने बताए।
उनले संशोधित ऐनले विकास निर्माणका अधिकांश अवरोध हटाउने दाबी गर्दै काम सम्पन्न नगर्ने निर्माण व्यवसायीलाई कालोसूची (ब्ल्याकलिस्ट) मा राखिने चेतावनी दिए।
‘सार्वजनिक खरिद ऐनले अब अधिकांश समस्या समाधान गर्छ। विगतका कमजोरी सुधार्ने जिम्मेवारी हाम्रो हो। काम नगर्ने निर्माण व्यवसायीलाई ब्ल्याकलिस्टमा राख्छौँ,’ मन्त्री लम्सालले भने।
उनले सबै आयोजना एउटै आर्थिक वर्षभित्र सम्पन्न गर्न सम्भव नभए पनि आगामी पाँच वर्षभित्र विकास निर्माणसँग सम्बन्धित समस्या समाधानका लागि सरकारले निरन्तर पहल गर्ने स्पष्ट पारे।
‘सबै योजना यही वर्ष सकिँदैनन्, तर पाँच वर्षभित्र सकेसम्म विकास निर्माणका समस्या समाधान गर्ने प्रयास गर्छौँ,’ उनले भने।
