काठमाडौँ। आईसीसी क्रिकेट विश्वकप लिग-२ अन्तर्गत नेदरल्यान्ड्समा जारी एकदिवसीय शृङ्खलामा नेपालले लगातार तेस्रो हार बेहोरेको छ।
सोमबार राति भएको खेलमा नामिबियासँग ३ रनले पराजित भएपछि नेपालको विश्वकप ग्लोबल क्वालिफायर पुग्ने सम्भावना थप कमजोर बनेको छ।
नामिबियाले दिएको २१२ रनको लक्ष्य पछ्याएको नेपालले निर्धारित ५० ओभरमा ६ विकेट गुमाएर २०८ रन मात्र बनाउन सक्यो।
नेपालका लागि आसिफ शेखले सर्वाधिक ४५ रन बनाए भने कप्तान रोहित पौडेलले ४१, आरिफ शेखले ३८ र कुशल भुर्तेलले ३४ रनको योगदान दिए। अन्तिम ओभरमा नेपाललाई १७ रन आवश्यक रहे पनि टोली लक्ष्यमा पुग्न सकेन।
यसअघि टस हारेर पहिले ब्याटिङ गरेको नामिबियाले ७ विकेट गुमाएर २११ रन बनाएको थियो।
जान फ्रायलिंकले १०० र लाउरेन स्टिनकाम्पले ५९ रन बनाए। नेपालका करण केसीले उत्कृष्ट बलिङ गर्दै १० ओभरमा २९ रन खर्चेर ५ विकेट लिए।
यही खेलसँगै करण नेपालका लागि एकदिवसीय अन्तर्राष्ट्रिय क्रिकेटमा १०० विकेट पूरा गर्ने दोस्रो खेलाडी बने।
नेपालले शृङ्खलाको अन्तिम खेल बुधबार घरेलु टोली नेदरल्यान्ड्ससँग खेल्नेछ।
