काठमाडौँ। नेपाली कांग्रेसका वरिष्ठ नेता गोपालमान श्रेष्ठको निधन भएको छ। कांग्रेसका कार्यवाहक मुख्यसचिव कृष्णप्रसाद दुलालका अनुसार श्रेष्ठको मंगलबार उपचारकै क्रममा निधन भएको हो।

श्रेष्ठको ८३ वर्षको उमेरमा वि.सं. २०८३ साउन १२ गते ललितपुरको जावलाखेलस्थित हेलिअस अस्पतालमा उपचारका क्रममा निधन भएको हो।

केही समयदेखि ललितपुरको जावलाखेलस्थित हेलियस अस्पतालमा उपचाररत श्रेष्ठ विगत एक वर्षदेखि क्यान्सरबाट पीडित थिए। उनको नेपाल र भारतका विभिन्न अस्पतालमा उपचार गरिएको थियो।

श्रेष्ठको पार्थिव शरीर बुधबार बिहान श्रद्धाञ्जलीका लागि नेपाली कांग्रेसको केन्द्रीय कार्यालय सानेपामा राखिनेछ। त्यसपछि शवयात्रासहित पशुपति आर्यघाटमा अन्त्येष्टि गरिने तयारी गरिएको कांग्रेसले जनाएको छ।

श्रेष्ठलाई केही दिनअघि मात्रै नेपाली कांग्रेसले वरिष्ठ नेताको जिम्मेवारी दिएको थियो। पार्टीमा उनले पुर्‍याएको लामो योगदानको कदर गर्दै सभापति गगनकुमार थापाले उनलाई वरिष्ठ नेता घोषणा गरेका थिए।

स्याङ्जाबाट पटक-पटक प्रतिनिधिसभा सदस्यमा निर्वाचित श्रेष्ठ नेपाली कांग्रेसका अनुभवी नेतामध्ये एक थिए। उनले भौतिक योजना, वन, उद्योग तथा शिक्षामन्त्रीका रूपमा जिम्मेवारी सम्हालेका थिए।

यसअघि कांग्रेस विभाजनपछि शेरबहादुर देउवा नेतृत्वको नेपाली कांग्रेस (प्रजातान्त्रिक) मा आबद्ध भएका उनले कार्यवाहक सभापतिको जिम्मेवारीसमेत निर्वाह गरेका थिए।

लोकतन्त्र र प्रजातन्त्रका पक्षमा भएका आन्दोलनमा सक्रिय भूमिका खेलेका श्रेष्ठ विभिन्न समयमा गरी करिब पाँच वर्ष जेल जीवनसमेत बिताएका थिए। उनी गत पुसमा सम्पन्न नेपाली कांग्रेसको विशेष महाधिवेशनको उद्घाटन सत्रमा पनि सहभागी भएका थिए।

श्रेष्ठको निधनसँगै नेपाली कांग्रेसले लामो राजनीतिक अनुभव भएका एक अग्रज नेता गुमाएको छ। उनका निधनप्रति विभिन्न राजनीतिक दलका नेता तथा शुभेच्छुकहरूले श्रद्धाञ्जली व्यक्त गरेका छन्।