तेह्रथुम । तेह्रथुममा एक ४३ वर्षे महिलालाई सामुहिक बलात्कार गरेको आरोपमा तीन जना युवा पक्राउ परेका छन् । खाम्लालुङ–४ का २७ वर्षीय सञ्चबहादुर इस्बो, २६ वर्षीय राजेन्द्र इस्वो र २२ वर्षीय सगुन इस्बोलाई बलात्कारको आरोपमा इलाका प्रहरी कार्यालय सक्रान्तिबजारले पक्राउ गरेको हो ।
उनीहरुलाई स्थानीय देवी विकको घरमा बुधबार भएको वैवाहिक कार्यक्रममा पाहुना आएकी महिलालाई धान नाच्न भन्दै जबरजस्ती तानेको र नजिकको घरमा लगी साँझ करिब ८:३० बजे सामुहिक बलात्कार गरेको उजुरीका आधारमा पक्राउ गरिएको जिल्ला प्रहरी कार्यालयका प्रहरी निरीक्षक रामप्रसाद ढकालले जानकारी दिए । पिडितले युवाहरुले पालैपालो बलात्कार गरी आफुलाई बेहोस् बनाएको र राति नै भागेको बताएकी प्रहरीले जनाएको छ ।
होस खुलेपछि विहान पिडित महिलाले आफन्तलाई खबर गरेको र आफन्तको उजुरीका आधारमा उनीहरुलाई प्रक्राउ गरिएको प्रहरी निरीक्षक ढकालले बताए । पक्राउ परेकाहरुलाई हिरासतमा लिई अनुसन्धान थालिएको जनाइएको छ ।
