काठमाडौं । देशैभर मौसम बिग्रिएको छ । चिसो छ । तर तापक्रम ह्वात्तै बढेको छ । काठमाडौं उपत्यकामा आइतबार न्यूनतम तापक्रम २ डिग्री सेल्सियस रहेकामा सोमबार एक्कासी बढेर ९.५ डिग्री सेल्सियस पुग्यो । मंगबलार बिहान पनि तापक्रम ९ डिग्री रहेको छ । 

सोमबार काठमाडौं विश्वकै सबैभन्दा प्रदूषित शहर बन्यो । आईक्यूएयर डटकमका अनुसार काठमाडौंमा वायुको गुणस्तर सबैभन्दा प्रदूषितको शीर्ष स्थानमा रह्यो । मंगलबार पनि त्यसरी सुधार हुन सकेको छैन । 

सोमबार झण्डै ६–७ डिग्री तापक्रम बढेको छ सबैजसो स्थानमा । यसको प्रमुख कारण पश्चिमी वायुको प्रभाव रहेको वरिष्ठ मौसमविद् गंगा नगरकोटी बताउँछिन् । उनले भनिन्, ‘न्यूनतम तापक्रम वृद्धि हुनुमा चाहिँ पोलुसन भन्दा पनि पश्चिमी वायुको प्रभावले हो । पश्चिमी वायु आउँदाखेरी यसले आफूसँगै बादल लिएर आउँछ ।’

उनले थपिन्, ‘बादल आएपछि यसले ब्ल्यांकेटको जस्तै काम गरिरहेको हुन्छ । बिहानपख तापक्रममा भारी गिरावट आउनु पर्ने त्यो समयमा माथिल्लो वायुमण्डलमा बादल बसेपछि पृथ्वीबाट तापक्रम बाहिरिन पाउँदैन । त्यसकारण न्यूनतम तापक्रममा वृद्धि भएको हो ।’ 

प्रदूषण हुनुको कारणबारे उनले भनिन्, ‘पश्चिमी वायुले केही मात्रामा जलवाष्पयुक्त हावा पनि ल्याइरहेको हुन्छ । काठमाडौंको इन्डेक्स त्यो त ठ्याक्कै थाहा भएन तर जुन धुम्म परेको हुन्छ, तुवाँलो लागेको हुन्छ त्यो बन्नका लागि केही मात्रामा धुलोका कणहरु पनि आवश्यक पर्छ । कमेन्सेसन न्यूक्लियर भन्ने हुन्छ एकदम सूक्ष्म कणहरु हुन्छन् । त्यसले जलवाष्पीकरणलाई आक्रमण गर्छ । त्यसपछि त्यो झुम्मिएर बस्छ । धेरै नै जलवाष्प छ भने बिहानीपख हुस्सु र कुहिरो बन्छ । दिउँसो हुँदै गएपछि अलिकति पातलो हुन्छ । अनि तुवाँलो हुन्छ ।’ 

मौसमविद् नगरकोटीले काठमाडौंको मौसम बुधबार सफा हुने सम्भावना रहेको बताइन् । बुधबारदेखि काठमाडौं उपत्यकाबाट पश्चिमी वायु पश्चिमी दिशामा बाहिरिने उनले बताइन् । 

मंगलबारको देशभरको मौसम 
हाल देशभर सामान्य बदली रहेको छ । दिउँसो देशभर सामान्य बदली रहने छ ।  सुदुर पश्चिम प्रदेश, कर्णाली प्रदेश, लुम्बिनी प्रदेश, गण्डकी प्रदेशका पहाडी भूभागहरुका थोरै स्थानहरु तथा बागमती र प्रदेश न। १ को भूभागहरुका एक वा दुई स्थानहरुमा हल्का वर्षाको सम्भावना रहेको छ । साथै देशका उच्च पहाडी तथा हिमाली भूभागमा भने हल्कादेखि मध्यम हिमपातको समेत सम्भावाना छ ।

राति देशभर आंशिक देखि सामान्य बदली रहि सुदुरपश्चिम प्रदेश र कर्णाली प्रदेशका पहाडी भूभागहरुका केही स्थानहरुमा हल्का वर्षाको सम्भावना रहेको छ । देशका उच्च पहाडी तथा हिमाली भूभागमा भने हल्कादेखि मध्यम हिमपातको समेत सम्भावना रहेको छ ।