काठमाडौं । अर्जेन्टाइन फुटबल स्टार लियोनल मेस्सीले रातो कार्ड खाएका छन् । उनले क्लब फुटबल करियरमा पहिलो पटक रातो कार्ड खाएका हुन् ।
स्पेनिश क्लब बार्सिलोनाबाट खेल्दै आएका मेस्सीलाई पहिलो पटक रातो कार्ड मिलेको हो । आइतबार राति भएको स्पेनिश सुपर लिग फुटबलको उपाधि भिडन्तका क्रममा एथ्लेटिक बिल्बाओ विरुद्धको खेलमा मेस्सीले रातो कार्ड खाएका हुन् ।
त्यो कार्ड उनले अतिरिक्त समयको अन्तिम मिनेटमा रातो कार्ड खाएका हुन् । बिल्बाओका भिलालिब्रालाई फाउल गरेपछि मेस्सीले रातो कार्ड पाएका थिए ।
बिल्बाओलाई उपाधि
बिल्बाओले स्पेनिश सुपर कप फुटबलको उपाधि जितेको छ । बार्सिलोनालाई अतिरिक्त समयमा ३–२ गोल अन्तरले पराजित गर्दै बिल्बाओ च्याम्पियन बनेको हो ।
निर्धारित समय २–२ गोलको बराबरीमा सकिएपछि खेल अतिरिक्त समयमा गएको थियो । अतिरिक्त समयमा इनाकी विलियम्सले गोल गर्दै बिल्बाओलाई जित दिलाए ।
अतिरिक्त समयमा धकेलिनु अघि एन्टोनी ग्रिजम्यानले ४० औं मिनेटमा गोल गर्दै बार्सिलोनालाई अग्रता दिलाएका थिए ।
४२ औं मिनेटमा ओस्कार डी मार्कोसले गोल गर्दै बिल्बाओलाई १–१ गोलको बराबरीमा ल्याए । ७७ औं मिनेटमा ग्रिजम्यानले व्यक्तिगत दोस्रो गोल गर्दै बार्सिलोनालाई २–१ को अग्रता दिलाए ।
९० औं मिनेटमा इजर भिलालिब्राले गोल गर्दै बिल्बाओलाई २–२ को बराबरीमा ल्याएका थिए । अतिरिक्त समयमा विलियम्सले गोल गर्दै बिल्बाओलाई उपाधि नै दिलाए ।
