काठमाडौं । फिफा वेस्ट अवार्ड अर्थात् फिफाको वर्ष खेलाडीको पुरुषतर्फको मनोनयन सार्वजनिक भएको छ । सो मनोनयनमा दुई पटकका अवार्ड विजेता अर्जेन्टाइन खेलाडी लियोनल मेस्सी र फ्रेन्च खेलाडी केलियन एमबाप्पे परेका छन् ।
यस्तै म्यानचेस्टर सिटीलाई ट्रेबल उपाधि जिताएका ६ खेलाडी मनोनयनमा परेका छन् । जसमा एर्लिङ हालान्डदेखि जुलियन अल्भारेज, केभिन डि ब्रुइन, इलके गुन्डोगोन, रोड्री र बर्नान्डो सिल्भा रहेका छन् ।
प्रारम्भिक १२ जनाको सूचीमा इङ्ल्याण्डका डेक्लान राइससमेत परेका छन् ।
यो मनोनयनमा पूर्व विजेता पोर्चुगिच खेलाडी क्रिस्टियानो रोनाल्डो भने परेका छैनन् ।
म्यानचेस्टर सिटीका प्रशिक्षक पेप ग्वार्डिओला वर्ष प्रशिक्षकको मनोनयनमा परेका छन् । उनले टोटनह्याम तथा सेल्टिकका पूर्व प्रशिक्षक एन्ज पोस्टेकोग्लू सहित अन्य तीन जना प्रशिक्षकसँग प्रतिस्पर्धा गर्नेछन् ।
यस्तै गोलकिपरतर्फ म्यानचेस्टर सिटीका इडर्सन मनोनयनमा परेका छन् भने म्यानचेस्टर युनाइटेडमा भर्खरै जोडिएका आन्द्रे ओनानासमेत समेटिएका छन् ।
राष्ट्रिय टिमका प्रशिक्षक, कप्तान, पत्रकार र फ्यानको भोटिङका आधारमा प्रारम्भिक सूचि सार्वजनिक गरिएको हो ।
मेस्सी फेरि पनि प्रमुख दाबेदार हुन् । तर एमबाप्पे पनि प्रतिस्पर्धामा मेस्सीलाई टक्कर दिन सक्छन् ।
