डोटी । सुदूरपश्चिम प्रदेशका प्रहरी प्रमुख तथा प्रहरी नायव महानिरीक्षक उत्तमराज सुवेदीले बैतडीको दोगडाकेदार गाउँपालिका–७ चेडेपानीकी १७ वर्षीया भागिरथी भट्टको घटनालाई प्रहरीले साँघुरो बनाउँदै ल्याएको बताएका छन् ।

सुवेदीले भागिरथी बलात्कार तथा हत्या घटनामा प्रहरी निकै चनाखो भएर घटनालाई साँघुरो बनाउँदै अघि बढेको बताए । उनले भने, “कतिपय अनुसन्धानका कुरा अहिले नै भन्न सकिँदैन, भागिरथी घटना निकै साँघुरो बनाउँदै ल्याएका छौँ, चाँडै हत्यारा पत्ता लाग्नेमा विश्वस्त भएका छौँ ।” भागीरथीका हत्यारा तथा बलात्कारीको खोजी अनुसन्धानका लागि सुदूरपश्चिम प्रदेश प्रहरी प्रमुख (डिआइजी) सुवेदी र प्रहरी वरिष्ठ उपरीक्षक जनकराज पाण्डेयसहितको टोली बैतडीमै खटिएको छ ।

उक्त घटनाका हत्यारा अहिलेसम्म पनि कोही पक्राउ नपरेको भन्दै डोटी जिल्लासहित समग्र सुदूरपश्चिममा दिनहुँ विद्यार्थीले आन्दोलन गर्दै आएका छन् । भागिरथी भट्टको हत्यारालाई चाँडो खोज गरी कारबाहीको माग गर्दै यहाँका सबै जिल्लामा प्रायः दैनिक जसो प्रदर्शन हुन थालेको छ । सहकर्मी विद्यार्थी साथीलाई बलात्कार गरी हत्या गरेको हप्ता दिनभन्दा बढी समय बितिसक्दासमेत हत्यारा तथा बलात्कारी पत्ता नलागेको भन्दै यहाँका विद्यार्थी आन्दोलनमा उत्रिन थालेको अनेरास्वयु डोटीका सहसंयोजक प्रकाश जोशीले बताए ।

उनले भने, “भागिरथी बहिनीको बलात्कारपछि हत्या भएको बिहीबार हप्ता दिनभन्दा बढी भइसकेको छ, अहिलेसम्म प्रहरी प्रशासनले हत्यारा त परै जाओस् सुराकसम्म पत्ता लगाउन नसकेका कारण हामी आन्दोलन गर्न बाध्य भएका छौँ, हत्यारा चाँडो पत्ता लगाओस् ।”

प्रदेश प्रहरी प्रमुख सुवेदीका अनुसार भागिरथी भट्टको ‘भेजाइनल स्वाब’ परीक्षणका लागि काठमाडौँ पठाइएको छ । बलात्कारपछि हत्या गरिएको आशङ्का गरिएकी उनको स्वाब परीक्षणका लागि राष्ट्रिय विधि विज्ञान प्रयोगशालामा पठाइएको सुदूरपश्चिम प्रदेश प्रहरी कार्यालय दिपायलका सूचना अधिकारी तथा प्रहरी वरिष्ठ उपरीक्षक मुकेशकुमार सिंहले जानकारी दिए । घटनाको प्रकृति हेर्दा बलात्कारपछि हत्या भएको आशङ्का गरिएकाले स्वाब परीक्षणका लागि पठाइएको उनको भनाइ छ । स्वाब परीक्षणपछि रिपोर्टले थप अनुसन्धानका लागि सहज हुने प्रहरीले अपेक्षा लिएको छ । सुदूरपश्चिम प्रदेश प्रहरी कार्यालय दिपायलका अनुसार प्रहरीले भागीरथीका आफन्तसँग सोधपुछ गर्नुका साथै शङ्कास्पद व्यक्तिमाथि बढी निगरानी बढाएर सूक्ष्म अध्ययन गरिरहेको जनाएको छ ।

यसका साथै तालीम प्राप्त कुकुरले भागिरथीको हत्या भएको जङ्गल क्षेत्र पनि प्रहरीले ‘सर्च’ गरेको तर कुकुरले खासै ठोस प्रमाण भने भेटाउन सकेको थिएन । उनले प्रयोग गरिरहेको मोबाइलबाट पनि केही कुरा पत्ता लाग्ने प्रहरीको अनुमान छ । भागिरथी भट्टको हत्यामा संलग्न दोषीलाई कानुनी दायरामा ल्याई कारबाही गर्न राष्ट्रिय मानव अधिकार आयोग, यहाँका विभिन्न सङ्घसंस्था, नागरिक समाजले सरकारसँग माग गरेका छन् । उनीहरूले विज्ञप्ति जारी गर्दै उक्त घटनाको तत्काल निष्पक्ष र प्रभावकारी अनुसन्धान गर्न, अनुसन्धानका क्रममा साक्षीको सुरक्षा र प्रमाण सङ्कलनमा विशेष सावधानी अपनाउन, घटनामा संलग्न दोषीको शीघ्र पहिचान गरी कानुनी दायरामा ल्याउन र पीडित परिवारलाई अन्तरिम राहत उपलब्ध गराउनसमेत सरकारसँग आग्रह गरेको छ ।

न्याय माग गर्दै दिनहुँ प्रदर्शन
कैलाली– एक साताअघि बलात्कारपछि हत्या गरिएकी बैतडीको दोगडाकेदार गाउँपालिका–७ चडेपानीकी १७ वर्षीया किशोरी भागिरथी भट्टको न्यायका लागि धनगढीमा दिनहुँ विरोध प्रदर्शन भइरहेको छ । बलात्कार जघन्य अपराध हो, भागिरथीलाई न्याय देऊ, भागिरथी कसैकी छोरी वा बहिनी हुन्, लगायत विभिन्न नारासहित धनगढीको ऐश्वर्य विद्या निकेतन कक्षा ११ र १२ मा अध्ययनरत छात्रछात्राले बिहीबार धनगढीमा विरोध प्रदर्शन गरेका छन् ।

ऐश्वर्य विद्या निकेतन कक्षा ११ की छात्रा पियन्सा भट्टले हत्यारालाई यथाशीघ्र कारबाहीको दायरामा ल्याउनुपर्ने भन्दै यसरी प्रदर्शन गर्न सडकमा आउन बाध्य भएको बताए । उनले भनिन्,  “दिनप्रति दिन बलात्कार जस्ता जघन्य अपराधका घटना बढिरहेका छन्, पढ्नका लागि विद्यार्थीलाई विद्यालय नै जान डर पैदा भइसक्यो, सामान्य पसलमा जान पनि डर भइसक्यो कहीँ कतै कोही आएर केही गरी पो हाल्छ कि भन्ने मनमा एक किसिमको असुरक्षित भएको महसुस पैदा भएको छ ।”

सोही विद्यालयकी अर्की छात्रा कविता कँडेलले घटना भएको एक साताभन्दा बढी भइसक्दा पनि हत्यारा अहिलेसम्म पत्ता लाग्न नसकेको दुखेसो पोखिन् । उनले भनिन‍्, “यो घटना पनि कहीँ कतै कञ्चनपुरकी निर्मला पन्तको घटना जस्तो त हुने होइन ?”

“छोरी बेटीले कहिलेसम्म यसरी असुरक्षित भएर बस्नुपर्ने”, छात्रा कँडेलले भनिन्, “सरकारले बैतडीकी भागिरथीको हत्यारालाई चाँडै पत्ता लगाई कडाभन्दा कडा सजाय दिनुपर्छ ।” कक्षा ११ मा अध्ययनरत छात्र विवेक पनेरुले सरकार हाम्रो अभिभावक भएकाले सरकारले हामीलाई हेर्नुपर्ने बताए । पनेरुले भने, “पार्टी अथवा कुनै सङ्घसंस्थाका प्रदर्शनका कार्यक्रम हुँदा सारा जनता सडकमा उत्रिन्छन्, प्रदर्शन गर्दछन्, तर बलात्कार जस्ता घटना घट्दा यसप्रति कसैको पनि ध्यान गएन ।”

उनले बलात्कारका हत्यारा पत्ता लगाउन सरकारको मात्र सम्पूर्ण भूमिका नभई जनताको पनि यसमा सहयोगको खाँचो रहेको विचार व्यक्त गरे । त्यसै गरी बैतडीकी भागिरथीको हत्यारालाई चाँडोभन्दा चाँडो पत्ता लगाई दोषीलाई कारबाहीको माग गर्दै धनगढीको त्रिनगर माध्यमिक विद्यालयका विद्यार्थीले पनि बुधवार धनगढीमा प्रदर्शन गरेको थिए ।

उनीहरूले बलात्कारका घटनाका दोषीलाई पत्ता लगाई फाँसीको सजाय हुनुपर्ने भन्दै प्रदर्शनमा नारा जुलुस गरेका थिए । धनगढीकै सुदूर पश्चिमाञ्चल क्याम्पसका विद्यार्थीले पनि केही दिनअघि प्रदर्शन गरेको थियो भने नगर बाल सञ्जाल धनगढीले पनि दैनिक जसो प्रदर्शन गरिरहेको छ ।  त्यस्तै भट्टको हत्या प्रकरणका दोषीलाई कारबाहीको माग गर्दै मङ्गलवार सुदूरपश्चिम प्रदेशका मुख्यमन्त्री त्रिलोचन भट्टलाई महिला अधिकारकर्मीले ध्यानाकर्षण गराउँदै ज्ञापन पत्र बुझाएका थिए । रासस