काठमाडौं । बैतडीको दोगडाकेदार गाउँपालिका–७ की १७ वर्षीया भागिरथी भट्टको बलात्कारपछि हत्या आरोपमा पक्राउ परेका एक जनालाई प्रहरीले केही बेरमै सार्वजनिक गर्दैछ ।
सुदूरपश्चिम प्रदेश प्रहरी कार्यालयका एसएसपी तथा प्रवक्ता मुकेश सिंहका अनुसार अभियुक्त केही बेरमै प्रहरीले सार्वजनिक गर्न लागेको हो ।
प्रहरीले ती अभियुक्तलाई नै बलात्कारी र हत्यारा भएको दाबीसहित सार्वजनिक गर्न लागेको हो । सिंहका अनुसार उनी भागिरथीकै विद्यालयमा कक्षा ११ मा अध्ययनरत १७ वर्षे युवक हुन् ।
प्रहरीका अनुसार उनी पनि भागिरथीको बलात्कारपछि हत्याको छानबिन गरी तत्काल अपराधी पक्राउ गर्न दवाव दिँदै आएको समूहसँग अग्रपंक्तिमा समेत देखिँदै आएका थिए ।
प्रहरीले उनीमाथि केही दिनदेखि निगरानी बढाएको र प्रमाण प्राप्त गरेपछि पक्राउ परेको बताएको छ । पक्राउ परेलगत्तै उक्त युवकले अपराध स्वीकारेकोसमेत प्रहरी स्रोतले बताएको छ ।
अभियुक्तले रिसइबीका कारण बलात्कारपछि हत्या गरेको बहाना बनाएको पनि बताइएको छ ।
