सुरक्षा थ्रेट छ भन्ने प्रधानमन्त्री ओली देश दौडाहामा, जाँदै मोरङ र झापा
प्रकाशित २०७७ फागुन १८ मंगलबार
691
Shares
काठमाडौं । आफूलाई सुरक्षा थ्रेट छ भन्दै कुनै समय नेकपाको बैठक केन्द्रीय कार्यालय धुम्बाराहीमा गर्न प्रस्ताव गर्दा ‘सुरक्षा थ्रेट छ बालुवाटारमै बसौं’ भन्ने प्रधानमन्त्री केपी शर्मा ओली पछिल्लो समय देश दौडाहामा लागेका छन् ।
सोमबारमात्रै पोखरा पुगेर फेरि सुरक्षा थ्रेटको कुरा निकालेका ओली मंगलबार मोरङ र झापा जाँदैछन् । प्रतिनिधिसभा विघटनको निर्णयलाई सर्वोच्च अदालतले उल्ट्याइदिएपछि ओली आफ्नो पक्षमा जनमत बटुल्ने नाममा देश दौडाहामा लागिरहेका छन् ।
उनी पछिल्लो समय विभिन्न आयोजनाको शिलान्यास र उद्घाटनमै रमाउन थालेका छन् । गत आइतबार झापा पुगेका ओली फेरि पनि मंगलबार झापा नै जान लागेका हुन् ।
ओलीले १२ः३० बजे अनारमनी नगरपालिकाले विपन्नहरूका लागि निर्माण गरेको एकीकृत बस्ती हस्तान्तरणको कार्यक्रममा सहभमागी हुने जनाइएको छ ।
त्यसलगत्तै उहाँ बिर्तामोडस्थित पूर्वाञ्चल क्यान्सर अस्पतालको उद्घाटनमा सहभागी हुने कार्यक्रम तय भएको छ । उक्त कार्यक्रम सकेर प्रधानमन्त्री ओली दिउँसो ३ बजे मोरङको उर्लाबारीमा निर्माण गर्न लागिएको एकीकृत सन्थाल बस्तीको शिलान्यासमा सहभागी हुने कार्यक्रम रहेको छ ।
ओली मंगलबार साँझ काठमाडौँ फर्कने जनाइएको छ ।
आगामी फागुन २३ गते संसद बैठक बस्नुअघि ओलीले धेरै भन्दा धेरै कार्यक्रममा सहभागीता जनाउने बुझिएको छ ।
