नेपालमा अधिनायकवाद र सर्वसत्तावाद ल्याउन खोज्ने सबै नेताहरु असफल भएका छन् : खाँड

प्रकाशित २०७७ चैत ६ शुक्रबार

काठमाडौं । नेपाली कांग्रेस संसदीय दलका प्रमुख सचेतक वालकृष्ण खाँडले यस्तोबेला कसैले कसैलाई दोष लगाउनुको साटो सबै एक भएर अघि बढ्नुपर्ने बताएका छन् ।

शुक्रबार प्रतिनिधिसभाको बैठकलाई सम्बोधन गर्दै खाँडले तीन महिनाभित्र मुलुकका सबै नागरिकलाई कोभिडविरुद्धको खोप लगाउने भनेर प्रधानमन्त्रीले सदनमै आएरगरेको प्रतिवद्धता पुरा गर्न नसकेको बताए । मेलम्चीको खानेपानीको परिकल्पना गर्ने पूर्वप्रधानमन्त्री कृष्णप्रसाद भट्टराईलाई स्मरण गर्ने सरकारले दिउँसै रात पार्ने खालको आश्वासन दिनु उपयुक्त नभएको औंल्याए ।

खाँडले सर्वोच्च अदालतले संसद विघटन खारेज गरिसकेको भएपनि प्रधानमन्त्रीले त्यसको नैतिक दायित्व लिएर जवाफ दिनुपर्ने आवाज उठाए । उनले भने, ‘सर्वोच्च अदालतले सरकारको असंवैधानिक कदमको खारेज गरेको छ, नेपाली कांग्रेसका तर्फबाट यसको स्वगत गर्न चाहान्छु,’ उनले भने, ‘यति ठूलो कदम चालिसकेपछि सकारले यसको दायित्व लिने कि नलिने ? प्रधानमन्त्रीले यसको नैतिक दायित्व लिनुपर्छ कि पर्दैन ? यसको जवाफ दिनुपर्छ कि पर्दैन ?’

संविधानको रक्षा गर्नु र पालना गर्नु सरकारको पहिलो दायित्व रहेको उल्लेख गर्दै प्रमुख सचेतक खाँडले संसदीय व्यवस्था र संविधानलाई सफल बनाउनतर्फ लाग्नुपर्ने पनि बताए । उनले थपे, ‘ संविधानको किताबमाथि हात राखेर एकचोटी सोच्नुहोस् । जुन स्प्रीटमा हामीले संविधान बनाएका थियौं, त्यसै अनुसार पालना गर्दै हुनुहुन्छ ?

खाँडले नेपालमा अधिनायकबाद ल्याउँछु, नेपालमा सर्वसत्तावाद ल्याउँछु, संविधान बदल्छु, नेपालमा तानाशाह ल्याउँछु र मेरो मानसपटलबाट निरंकुशताबाट अघि बढ्छु भन्ने नेताहरु सबै असफल भएका छन्, त्यसैले त्यो बाटोबाट अघि नबढ्न उनले आग्रह गरे ।