त्रिदेशीय अन्तर्राष्ट्रिय फुटबल दशरथ रंगशालामा मंगलबारदेखि, यस्तो छ भिडन्त

प्रकाशित २०७७ चैत ९ सोमबार

काठमाडौं । नेपालको दशरथ रंगशालामा त्रिदेशीय अन्तराष्ट्रिय फुटबल प्रतियोगिता हुँदैछ । मंगलबारदेखि आयोजना हुने प्रतियोगिताको तयारी पूरा भएको अखिल नेपाल फुटबल संघ एन्फाले जनाएको छ ।

एन्फाले आइतबार पत्रकार सम्मेलन गरी प्रतियोगिताको सम्पूर्ण तयारी पूरा भएको जानकारी दिएको हो । प्रतियोगिताको प्रत्यक्ष प्रसारण नेपाल टेलिभिजनले गर्ने भएको छ ।

नेपाल टेलिभिजनसँगको यसअघिको सम्झौता अनुसार त्रिदेशीय फुटबलको प्रत्यक्ष प्रसारण अधिकार नेपाल टेलिभिजनलाई दिइएको एन्फाका प्रवक्ता किरण राईले बताए ।

यस्तो छ खेल तालिका
खेलमा तीन टिम रहेका छन् । नेपाल, बंगलादेश र कीर्गिस्तान । नेपाल र बंगलादेशका सिनियर टिम हुँदा कीर्गिस्तानको यु–२३ को टिम हो ।

उद्घाटन खेलमा १० गते मंगलबार बंगलादेश र कीर्गिस्तान खेल्दैछन् ।

चैत १२ गते नेपाल र कीर्गिस्तान खेल्दैछन् ।

चैत १४ गते नेपाल र बंगलादेश खेल्नेछन् ।

राउण्ड रोबिनको आधारमा हुने लिगको शीर्ष दुई टिमले फाइनलमा प्रतिस्पर्धा गर्ने छन् ।

फाइनल खेल चैत १६ गते हुनेछ ।

उपाधि विजेताले पाँच हजार अमेरिकी डलर जित्नेछ ।

प्रिम्याच कन्फ्रेन्स सोमबार
प्रतियोगिताको प्रिम्याच कन्फ्रेन्स सोमबार हुँदैछ । पत्रकार सम्मेलन सोमबार दिउँसो २ बजे सोल्टी होटलमा आयोजना हुने एन्फाले जनाएको छ ।

हरेक टिमले उपाधि आफैले जित्ने दाबी गरेका छन् । सोमबार फेरि टिमहरुले उक्त दाबी दोहोर्याउने छन् ।