सरकारले हठातमा संसद स्थगित गरेर संसदको मानमर्दन गर्‍यो: नेता सिंह

हाम्रा कुरा

प्रकाशित २०७८ वैशाख ६ सोमबार

काठमाडौं । नेपाली कांग्रेसका नेता प्रकाशमान सिंहले बर्तमान सरकारले हठातमा संसद स्थगित गरेर संसदको मानमर्दन गरेको भन्दै कायरता प्रदर्शन गरेको बताएका छन् ।

संसद फेस गर्न नसकेर पटक पटक संसदमाथि प्रहार गरेकोप्रति आपत्ति जनाउँदै उनले अलोकतान्त्रिक कदम उठाउने सरकारले फेरिपनि संसदीय व्यवस्था माथि अर्को प्रहार गरेको बताए ।

नेता सिंहले एकपछि अर्को अलोकतान्त्रिक चरित्र सरकारले देखाउँदै साथै प्रधानमन्त्री केपी शर्मा ओली नेतृत्वको सरकारले प्रेस स्वतन्त्रतामाथि अङ्कुश लगाउने प्रयास समेत जारी राखेको आरोप लगाए ।

नेपाल प्रेस युनियन काठमाडौं शाखाले सोमबार काठमाडौंमा आयोजन गरेको नवनिर्वाचित पत्रकार महासंघका पदाधिकारी सम्मान कार्यक्रममा बोल्दै नेता सिंहले ओली नेतृत्वको सरकारले प्रेस स्वतन्त्रतामाथि अङ्कुश लगाउने प्रयास गरिरहेको र हामी सबै मिलेर त्यसको प्रतिवाद गर्नुपर्ने बताएका हुन् ।

नवनिर्बाचित पदाधिकारीलाई बधाई तथा सफल कार्यकालको शुभकामना ब्यक्त गर्दै नेता सिंहले भने, 'ओली सरकारले प्रेस स्वतन्त्रतामाथि अङ्कुश लगाउने प्रयास गरिरहेको छ । सबै मिलेर प्रतिवाद गर्नुपर्छ ।’

फरक प्रसङ्गमा नेता सिंहले कोरोना नियन्त्रणमा सरकार उदासिन भएको पनि बताए । साथै नेता सिंहले अब देशलाई निकास दिलाउन नेपाली काग्रेसको नेतृत्वमा सरकार बन्नुपर्ने बताए ।

कार्यक्रममा बोल्दै महासंघका अध्यक्ष बिपुल पोखरेलले सरकारका प्रेस विरोधी कदमविरुद्ध कडा रुपमा प्रस्तुत हुने बताए । कार्यक्रममा पूर्वअर्थ राज्यमन्त्री उदय समशेर राणा, काठमाडौं महानगरपालिकाका उपमेयर हरिप्रभा खड्गी लगायतले राखे । कार्यक्रम प्रेस युनियन काठमाडौंका अध्यक्ष जगन्नाथ दुलालको सभापतित्वमा सम्पन्न भएको हो ।