काठमाडौं । ईन्डियन प्रिमियर लिग (आईपीएल) टी–२० क्रिकेटको १४ औं संस्करणमा दिल्ली क्यापिटल्स भाग्यमानी टिम ठहरिएको छ । चेन्नईमा आइतबार राति भएको खेलमा दिल्लीले सनराईजर्स हैदराबादलाई सुपर ओभरमा पराजित गर्दै दिल्लीले चौंथो जित निकालेको हो ।
दिल्लीले दिएको १६० रनको लक्ष्यसहित जवाफी ब्याटिङ गरेको हैदराबादले २० ओभरमा ७ विकेट गुमाएर १५९ रन जोडेपछि खेल सुपर ओभरमा गएको थियो ।
सुपर ओभरमा हैदराबादले मात्र ७ रन जोड्यो । जवाफमा दिल्लीले सहजै नतिजा आफ्नो पक्षमा पार्यो ।
यसअघि पहिले ब्याटिङ गरेको दिल्लीले २० ओभरमा ४ विकेटको नोक्सानीमा १५९ रन बनाएको थियो ।
दिल्लीका लागि पृथ्वी शाले ५३ रन बनाए । कप्तान ऋषव पन्तले ३७ तथा स्टिभ स्मिथले नटआउट ३४ रन बनाए ।
हैदराबादका सिद्धार्थ कउलले २ विकेट लिए । राशिद खानले १ विकेट लिए ।
जवाफमा १५९ रन नै जोडेको हैदराबादका केन विलियम्सनले नटआउट ६६ तथा जोनी बेयर्स्टोले ३८ रन बनाए । दिल्लीका अभेश खानले ३ तथा अक्षर पटेलले २ विकेट लिए ।
बैंगलोर भर्सेस चेन्नई
रोयल च्यालेन्जर्स बैंगलोरले पहिलो हार भोगेको छ । बैंगलोरलाई चेन्नई सुपर किङ्सले हरायो । मुम्बईमा आइतबार भएको खेलमाबैंगलोरलाई ६९ रनले पराजित गर्दै चेन्नईले चौंथो जित निकाल्यो ।
चेन्नईले दिएको १९२ रनको लक्ष्य पछ्याएको बैंगलोरले २० ओभरमा ९ विकेट गुमाएर १२२ रन मात्र बनाउन सक्यो ।
देवदुत पडिकलले सर्वाधिक ३४ रन बनाए को इनिङमा चेन्नईका रविन्द्र जडेजाले ३ तथा इमरान ताहिरले २ विकेट लिए ।
यसअघि टस जितेर पहिले ब्याटिङ गरेको चेन्नईले २० ओभरमा ४ विकेट गुमाएर १९१ रन बनाएको थियो ।
रविन्द्र जडेजाले नटआउट ६२, फाप डु प्लेसिसले ५० रन बनाए । बैंगलोरका हर्षल पटेलले ३ विकेट लिए ।
अंकतालिका
चेन्नई लिगको शीर्ष स्थानमा उक्लिएको छ । चेन्नईले ५ खेलमा ८ अंक जोडेको छ । दिल्ली पनि ५ खेलबाट ८ अंकसहित दोस्रो स्थानमा पुगेको छ ।
पहिलो हार भोगेको बैंगलोर ५ खेलमा ८ अंक जोडेर तेस्रो स्थानमा झरेको छ ।
सोमबारको खेल
सोमबार एउटामात्र खेल हुनेछ । पंजाब किंग्सले कोलकाता नाइट राइडर्ससँग खेल्दैछ । खेल बेलुकी ७ः४५ बजे हुनेछ ।
पंजाब ५ खेलबाट ४ अंकसहित पाँचौं तथा कोलकाता ५ खेलबाट २ अंकसहित पुछारमा छ ।
