काठमाडौं । इन्डियन प्रिमियर लिग आईपीएल टी–२० क्रिकेटमा बलिउड अभिनेता शाहरुख खानको कोलकाता नाइट राइडर्सले दोस्रो सफलता हासिल गरेको छ ।
लगातरा हारले पुछारमा रहेको कोलकाताले सोमबार राति अहमदाबादमा भएको खेलमा बलिउड अभिनेत्री प्रीति जिन्टाको पन्जाब किङ्सलाई ५ विकेटले पराजित गर्दै पाँचौं स्थानमा पुग्न सफल भएको छ ।
पन्जाबले दिएको १२४ रनको विजयी लक्ष्य कोलकाताले १६.४ ओभरमा ५ विकेटको नोक्सानीमा पूरा गर्यो ।
कप्तान इयान मोर्गनले ४० बलमा नटआउट रहँदै ४७ रन जोडे । राहुल त्रिपाठीले ३२ बलमा ४१ रन बनाए । पन्जाबका मोहमद शामी, मोइसेस हेन्रिक्स, आर्शदिप सिंह र दिपक होडाले १–१ विकेट लिए ।
यसअघि पहिले ब्याटिङ गरेको पन्जाबले कमजोर खेल खेल्दै ९ विकेटको नोक्सानीमा १२३ रनमात्रै बनाएको थियो ।
पन्जाबका मायांक अग्रवालले ३४ बलमा जोडेको ३१ रन नै सर्वाधिक भएको थियो । त्यस्तै क्रिस जोर्डनले १८ बलमा ३० रन बनाए । शाहरुख खानले १३ रन बनाए ।
कोलकाताका प्रसिद्ध कृष्णले ३ तथा सुनिल नारिन र पाट कुमिन्सले २–२ विकेट लिए ।
अंक तालिका
जितसँगै कोलकाता ६ खेलबाट ४ अंकसहित पाँचौं स्थानमा उक्लिएको छ । पन्जाब ६ खेलबाट ४ अंकसहित छैटौं स्थानमा झरेको छ ।
चेन्नई सुपर किंग्स ५ खेलबाट ८ अंकसहित शीर्ष स्थामा रहेको छ । ८ अंककै दिल्ली क्यापिटल्स दोस्रो तथा ८ अंकबाटै रोयल च्यालेन्जर्स बैंगलोर तेस्रो स्थानमा झरेको छ ।
मुम्बई इन्डियन्स ५ खेलबाट ४ अंकसहित चौथो स्थानमा छ । राजस्थान रोयल्स ५ खेलबाट ४ अंकसहित सातौं तथा सनराइजर्स हैदराबाद ५ खेलबाट २ अंकसहित पुछारमा छ ।
मंगलबारको भिडन्त
मंगलबार दिल्ली र बैंगलोर भिड्दै छन् । जित्ने टिम शीर्ष स्थानमा पुग्नेछ । हार्ने टिमको यो दोस्रो हार हुनेछ ।
