धोनीको चेन्नई शीर्ष स्थानमा, हैदराबाद पुछारमै रमाउन वाध्य

हाम्रा कुरा

प्रकाशित २०७८ वैशाख १६ बिहिबार

काठमाडौं । इन्डियन प्रिमियर लिग (आईपीएल) टी–२० क्रिकेटमा फेरि शीर्ष स्थानमा पुगेको छ । दिल्लीमा बुधबार राति भएको खेलमा सनराइजर्स हैदराबादलाई ७ विकेटले पराजित गर्दै चेन्नई फेरि शीर्ष स्थानमा पुगेको हो ।

हैदराबादले दिएको १७२ रनको विजयी लक्ष्य चेन्नईले १८.३ ओभरमा ३ विकेट गुमाएर पूरा गर्यो । रुतुराज गायकवाडले ४४ बलमा ७५ रन बनाए । उनले यति ठूलो योगफल जोड्दा एउटा पनि छक्का प्रहार गरेनन् ।

त्यस्तै फाप डु प्लेसिसले ३८ बलमा ५६ रन बनाए । हैदराबादका राशिद खानले मात्रै विकेट लिने क्रममा सबै ३ विकेट लिए ।

यसअघि टस जितेर पहिले ब्याटिङ गरेको हैदराबादले २० ओभरमा ३ विकेटको नोक्सानीमा १७१ रन बनाएको थियो ।

मनिष पाण्डेले ४६ बलमा ६१ रन बनाए । त्यस्तै कप्तान डेभिड वार्नरले ५७ रन बनाए ।

चेन्नईका लुंगी एनजिडीले २ तथा साम कुरनले १ विकेट लिए ।

अंक तालिका
जितसँगै चेन्नई ६ खेलमा १० अंक जोड्दै शीर्ष स्थानमा रहेको छ । चेन्नईले रोयल च्यालेन्जर्स बैंगलोरलाई रन रेटमा पछाडि पार्दै शीर्ष स्थानमा उभ्याएको हो ।

दिल्ली क्यापिटल्स ८ अंकसहित तेस्रो स्थानमा रहेको छ ।

हैदराबाद भने ६ खेलमा २ अंकसहित पुछारमै रहेको छ । उसले एउटामात्र खेल जितेको छ ।

बिहीबारको खेल
बिहीबार दुई खेल हुनेछन् । पहिलो खेलमा दिउँसो ३ः४५ बजे मुम्बई इन्डियन्सले दिल्लीमा राजस्थान रोयल्ससँग खेल्दैछ ।

दोस्रो खेलमा बेलुकी ७ः४५ बजे दिल्ली क्यापिटल्सले अहमदाबादमा कोलकाता नाइट राइडर्ससँग खेल्नेछ ।