एमालेको महाधिवेशन आयोजक कमिटी भंग, आठ नेतालाई लगियो स्थायी कमिटीमा

हाम्रा कुरा

प्रकाशित २०७८ असार १६ बुधबार

काठमाडौं। नेकपा एमालेको महाधिवेशन आयोजक कमिटी भंग गर्दै आठ नेतालाई स्थायी कमिटीमा मनोनयन गरिएको छ ।

महाधिवेशन आयोजक कमिटीको नाममा भए गरेका एमालेका कामकारवाही केन्द्रीय कमिटीकै नामबाट सन्चालन हुने गरी एमालेलाई २०७५ जेठ २ को अवस्थामा फर्काउदै माओवादीबाट आएका नेतासहित आठलाई स्थायी कमिटीमा मनोनयन गरेको हो ।

वालुवाटारमा बुधवार बसेको महाधिवेशन आयोजक कमिटीको बैठकले नेकपा एकतापछि स्थायी कमिटीमा समेटिएका एमालेका चार र माओवादीका चार नेतालाई थप गरेको हो । महाधिवेशन आयोजक कमिटी खारेजसँगै माधव नेपालसहित ११ जना नेतामाथि यसअघि गरिएको कारवाही समेत फिर्ता भएको छ ।

नेकपा एकता प्रक्रियामा एमालेबाट थपिएका रघुवीर महासेठ, विष्णु रिमाल, बेदुराम भुसाल र रघुजी पन्तसहित माओवादीतर्फ नलागी एमालेमा समाहित भएका रामबहादुर थापा बादल, टोपबहादुर रायमाझी, लवेखराज भट्ट, मणि थापा स्थायी कमिटी सदस्य बनेका छन् ।