काठमाडौँ। नेकपा (एमाले) केन्द्रीय कमिटीको १३ औँ बैठक सम्पन्न भएको छ। आजको बैठक पार्टीको साङ्गठनिक कामकारबाहीका विषयमा केन्द्रित भएको प्रचारप्रसार विभाग उपप्रमुख सूर्य थापाले जानकारी दिए। बैठकमा पार्टी महासचिव ईश्वर पोखरेलले पाँच बुँदे साङ्गठनिक योजना पेस गरेका थिए। बैठकले महासचिव पोखरेलले पेस गरेको साङ्गठनिक योजना पारित गरेको छ।
सो अन्तर्गत असार मसान्तसम्म पार्टी सदस्यता नवीकरण गराइसक्नुपर्ने, साउन ५ गतेभित्र त्यसको अभिलेख पार्टी केन्द्रीय कार्यालयमा पठाइसक्नुपर्ने, केन्द्रीय कमिटीको यसअघिको बैठकले तय गरेको आगामी साउन २५ देखि २७ गतेसम्म विधान अधिवेशन काठमाडौँमा गर्ने, त्यसका निम्ति पार्टीका अध्यक्षका संयोजकत्वमा राजनीतिक प्रतिवेदन, महासचिवका संयोजकत्वमा सङ्गठनात्मक प्रस्ताव, सङ्गठन विभाग प्रमुखको संयोजकत्वमा विधान संशोधन प्रस्ताव र नेता रामबहादुर थापाका संयोजकत्वमा व्यवस्थापन समिति गठन गर्ने प्रस्ताव पेस भएको थियो।
पार्टीको तल्ला तहका अधिवेशन अन्तर्गत आगामी भदौ ५ गते वडा स्तर र १५ गते पालिका स्तरका अधिवेशन सम्पन्न गर्ने प्रस्ताव पेस भएको थियो। केन्द्रीय तहका ३२ विभागमा रहने व्यक्तिको नाम प्रस्ताव गर्न यसअघि नै जारी अन्तर पार्टी निर्देशनअनुसार मागिएको सिफारिस अविलम्ब पठाउन आग्रह गरिएको छ।
स्थायी कमिटीको आगामी बैठकले विभागमा रहने सदस्यको नामावली टुङ्ग्याउने गरी प्रस्ताव गरिएको थापाले जानकारी दिए। सिङ्गो मुलुक निर्वाचनको तयारीमा जुट्न अनुरोध गरिएको छ। पेस भएको प्रस्तावमा घनीभूत छलफल भएको उनले जानकारी दिए।
