नासाका नेपाली वैज्ञानिक सुरेन्द्र अधिकारीले पाए 'जोन वाह्र' पुरस्कार

हाम्रा कुरा

प्रकाशित २०७८ भदौ ३० बुधबार

काठमाडौं। अमेरिकी अन्तरिक्ष एजेन्सी नासामा रहेका नेपाली वैज्ञानिक सुरेन्द्र अधिकारीले 'जोन वाह्र अर्लि करियर' पुरस्कार पाएका छन् । नासाको क्यालिफोर्निया स्थित जेट प्रोपल्सन प्रयोगशालामा सुरेन्द्र अधिकारी पृथ्वी र अन्तरिक्ष सम्बन्धी अन्वेषण गर्ने वैज्ञानिक हुन् ।

वैज्ञानिक अधिकारीलाई अमेरिकी भुभाैतिकी संघ (एजीयु)ले पुरस्कृत गरेको हो । सन् १९१९ मा अमेरिकामा स्थापित एजीयुले पृथ्वी र अन्तरिक्षका क्षेत्रमा रहेका वैज्ञानिक, अन्वेषक एवं खोजकर्ताहरूका क्षेत्रमा काम गर्दै आएको छ ।

पृथ्वी एवं अन्तरिक्ष क्षेत्रमा योगदान दिने वैज्ञानिक एवं खोजकर्ताहरुलाई पुरस्कृत गर्दै आएको एजीयुले सन् २०२१ को जोनवाह्रअर्लि करियर पुरस्कारबाट वैज्ञानिक अधिकारीलाई सम्मानित गरेको हो ।

हाम्राकुरासँग बोल्दै वैज्ञानिक अधिकारीले यस वर्षको जोन वाह्र अर्लि करियर पुरस्कारबाट सम्मानित हुन पाएकाेमा खुसी व्यक्त गरे ।

वैज्ञानिक अधिकारीले नासामा हिमताल, बरफ, समुद्री सतह, भूभौतिक एवं पृथ्वीको ज्यामितीय आकारका क्षेत्रमा अनुसन्धान एवं अन्वेषण गर्दै आएका छन् । उनले जलवायु परिवर्तनका कारण ध्रुविय हिँउ पग्लिएर पृथ्वीको घुम्ने गति र दिशामा परिरहेको असरबारे बिशेष खोज गरेका थिए ।