काठमाडौं। नेपाली कांग्रेसले १३ जिल्लामा दसैँपछि मात्रै वडा अधिवेशन गर्ने भएको छ। तर कहिले गर्ने भन्ने तय भएको छैन। कांग्रेसले हालसम्म ६४ जिल्लामा वडा अधिवेशन सम्पन्न गरिसकेको छ। प्रदेश नं २ का आठ जिल्ला तथा सुर्खेत, डोल्पा, रसुवा, बाँके र कैलालीमा वडा अधिवेशन बाँकी छ।
कांग्रेसले अझै चार जिल्लाको क्रियाशील सदस्यताको नामावली सार्वजनिक गरेको छैन । रसुवा, सप्तरी, रौतहट र बाराको क्रियाशीलताको टुङ्गो लाग्न बाँकी छ ।
कांग्रेसले पछिल्लो पटक गत बिहीबार राती पर्सा जिल्लाको सदस्यता सार्वजनिक गरेको थियो । त्यसअघि गत मङ्गलवार राति धनुषा, सर्लाही र कैलालीको क्रियाशील सदस्यताको अन्तिम नामावली सार्वजनिक भएको थियो ।
कांग्रेस निर्वाचन समितिका सदस्य जगन्नाथ श्रेष्ठले अब चार जिल्लाको मात्र क्रियाशील सदस्यता नामावली सार्वजनिक गर्न बाँकी रहेको बताए ।
कांग्रेस उच्च स्रोतका अनुसार अब वडा अधिवेशन हुन बाँकी १३ जिल्लामा एकै पटक दसैँपछि वडा अधिवेशन हुनेछ । ति जिल्लाका लागि तोकिने निर्वाचन अधिकृत कानुन व्यवसायीहरूले नै दसैँपछि मात्रै अब अधिवेशन गर्न सकिने निर्वाचन समितिलाई भनेका छन् ।
सो विषयमा निर्वाचन समितिले पार्टी नेतृत्वलाईसमेत जानकारी गराइसकेको निर्वाचन समितिले बताएको छ । निर्वाचन समितिको बैठक अहिले जारी छ ।
कांग्रेसले यसअघि क्रियाशील सदस्यताको विवरण सार्वजनिक भएका जिल्लामा वडा अधिवेशन सम्पन्न गरी ती जिल्लामा गाउँ÷नगर अधिवेशन गरिरहेको छ भने केही जिल्लामा प्रदेश सभा र प्रतिनिधि सभा निर्वाचन क्षेत्रीय अधिवेशनसमेत जारी छ । यस्तै केही जिल्लामा जिल्ला अधिवेशनसमेत सुरु भइसकेका छन् ।
