दार्चुला । नेपाली कांग्रेसको पालिका अधिवेशनमा पराजित भएपछि कांग्रेसका नेता एवं ब्याँस गाउँपालिका वडा नम्बर ५ का अध्यक्ष मंगल सिंह धामीले एमाले प्रवेश गरेका छन् । नेकपा एमालेको ललितपुरस्थित गोदावरीमा भएको प्रथम विधान महाधिवेशनमा धामीले नेकपा एमाले प्रवेश गरेका हुन् ।
उनलाई नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले टिका लगाएर पार्टी प्रवेश गराएको नेकपा एमाले दार्चुलाका प्रचार प्रसार विभाग प्रमुख खडक बडालले जानकारी दिए । नेपाली कांग्रेस ब्याँस गाउँपालिका सभापतिमा सहमतिमै नेतृत्व चयन हुन नसक्दा निर्वाचन गराइएको थियो । निर्वाचनमा प्रतिद्वन्द्वी नरेश दत्त भट्ट विजयी भएपछि उनी रुष्ट देखिएका थिए ।
निर्वाचन हुनुभन्दा अगाडी दुबै उम्मेद्वारहरुले पार्टीलाई घात पुग्ने कुनै काम नगर्ने प्रतिवद्धता पत्रमा हस्ताक्षरसमेत गरेका थिए । कांग्रेस ब्याँस गाउँ सभापति पदमा पराजीत भए लगत्तै धामी कांग्रेसले आफ्नो मूल्याङ्न नगरेको भन्दै नेकपा एमाले प्रवेश गरेका हुन् ।
धामी २०७४ सालको स्थानीय तहको निर्वाचनमा नेपाली कांग्रेस पार्टीबाट ब्याँस गाउँपालिका वडा नम्बर ५ को अध्यक्षमा निर्वाचित भएका थिए । वितगमा उनी माओवादी निकट शिक्षक संगठनका जिल्ला अध्यक्षसमेत रहेका थिए ।
