सन्काहा शासकको गिनिज बुकमा नाम लेखाउने रहरले तीन वर्ष खेर गयो
हाम्रा कुरा
प्रकाशित २०७८ कार्तिक ५ शुक्रबार
780
Shares
काठमाडौँ। प्रमुख सत्तारुढ दल नेपाली काँग्रेसका नेता गगन थापाले सरकारको काम प्रति असन्तुष्टि जनाएका छन्। नेपाल विद्युत् प्राधिकरण कर्मचारी सङ्घले शुक्रवार आयोजना गरेको कार्यक्रममा बोल्दै थापाले सरकारले सोचे जस्तो गति लिन नसकेको बताएका हुन्।
‘सरकारले जुन गति पक्रनु पर्ने हो, त्यो गति हामीले पक्रन सकेका छैनौँ, त्यसैले डर लागेको छ, नेपाली नागरिक भएर, जसरी हामीले २००७ सालपछिको समय खेर फाल्यौँ, फेरि हामीले अव अर्को मौका खेर फाल्दै छौ कि भन्ने डर लाग्न थालेको छ, यो बेला सम्हालिनु पर्नेछ।’ नेता थापाले सम्बोधनका क्रममा भने।
उनले नेपाल विश्वमा अर्थतन्त्रका हिसाबले चिनिएका दुई ठुला मुलुकको बिचमा रहेको भन्दै त्यसको फाइदा सरकारले लिन सक्नु पर्नेसमेत बताए। त्यसो नगर्ने हो भने एक पटक फेरी मौका छुट्ने थापाको भनाइ छ।
‘वर्ल्डको इकोनोमी सबै गतिविधि कहाँ छ?, चीन र भारत केन्द्रित छ, त्यसको नजिकमा हामी छौँ, यसभित्र नेपालले लाभ लिन सक्यो भने सक्यो, यो अर्को १०, १५, २० वर्ष रहन्छ, यसभित्र नेपालले लाभ लिन सक्यो भने सक्यो, नत्र फेरि एक पटक मौका छुट्छ।’ थापाले अघि भने।
उनले प्रधानमन्त्री केपी ओली प्रति लक्षित गर्दै विगतको तीन वर्षको समय खेर गएकोसमेत दाबी गरे। ओलीको गिनिज बुकमा नाम लेखाउने रहरले सो समय खेर गएको उनले भनेका हुन्।
‘लामो समयको अनुभव पछाडि संविधान ल्याएर नयाँ चरणमा प्रवेश गर्यौ, फेरि नेपालले अर्को मौका पाएको फेरि २०७४ सालबाट एउटा सन्काहा शासकलाई गिनिज बुकमा नाम लेखाउने रहर चढ्दा तीन वर्ष खेर गयो।’ थापाले भने।
उनले विद्युत् खपत बढाउने विषयमा ध्यान दिन प्रधानमन्त्री शेरबहादुर देउवालाई आग्रहसमेत गरे। त्यसका लागि सरकारले योजनाबद्ध रूपमा कार्यक्रम तय गर्नु पर्ने उनको भनाइ छ।
