माधव नेपाल देश बनाउन होइन एमाले बिगार्न दौडिरहेका छन् : केपी ओली

हाम्रा कुरा

प्रकाशित २०७८ कार्तिक १३ शनिबार

काठमाडौं । नेकपा एमालेका अध्यक्ष केपी शर्मा ओलीले आफूहरु देश बनाउने अभियानमा जुटेको बताएका छन् ।

एमाले सिन्धुपाल्चोक-काठमाडौं सम्पर्क मञ्चको भेलालाई सम्बोधन गर्दै ओलीले समृद्ध नेपाल र नेपालीलाई सुखी बनाउने आफूहरुको अभियान रहेको बताएका हुन् ।

उनले आफ्नो पार्टीलाई कसैले मास्न नसक्ने दाबी गर्दै माधव नेपाल एमाले बिगार्न देशभर दौडिरहेको आरोप लगाए । ‘बिचरा माधव नेपाल कुदेको देख्दा माया लाग्छ। कहिले पोखरा, कहिले धरान, कहिले धनकुटा, कहिले बाग्लुङ।’ उनले भने, ‘माधव नेपाल देश बनाउन होइन एमाले बिगार्न कुदेका हुन्।’

ओलीले भने, ‘हामी देश बनाउने अभियानमा छौं। हाम्रो कार्यक्रम समाजवाद उन्मुख छ र हामी कार्यकर्ताहरुले समाजवादका बारेमा स्पष्ट पारिरहेका छन् ।’ उनले नेकपा(एकिकृत समाजवादी)लाई समाजवाद नबुझेर एमालेबाट फुटेर गएको चुइटोको संज्ञा दिए ।