पनौतीमा केएमसीको स्वास्थ्य शिविर, ११ सय बिरामीको निःशुल्क उपचार
हाम्रा कुरा
प्रकाशित २०७८ पुष १४ बुधबार
469
Shares
काभ्रे । काठमाडौंको सिनामंगलस्थित काठमाडौं मेडिकल कलेजले काभ्रेको पनौतीमा मंगलबार निःशुल्क स्वास्थ्य शिविर सञ्चालन गरेको छ । पनौती नगरपालिका १२ नं. वडा कार्यालयसँग सहकार्य गरेर एक दिने शिविर सञ्चालन गरिएको हो ।
स्थानीय वाल प्रकाश माध्यमिक विद्यालयमा आयोजित शिविरमा १ हजार १ सय ७२ बिरामीको निःशुल्क उपचार गरिएको केएमसीका जेनेरल मेनेजर नारायण दाहालले जानकारी दिए । उनका अनुसार शिविरमा २१६ जनाको रक्त परीक्षण, १९७ जनाको मुटुको जाँच (इसीजी) र १९५ जनाको भिडियो एक्सरे गरिएको छ ।
दाँतमा समस्या भएर आएका ३५ जना बिरामीको दाँत उखेलिएको छ । यता, शिविरमा उपचार सम्भव नभएका ४२ जना बिरामीलाई अप्रेशनका लागि अस्पताल रेफर गरिएको आयोजकले जनाएको छ ।
केएमसीले बिभिन्न जिल्लामा पुगेर निःशुल्क स्वास्थ्य शिविर सञ्चालन गर्दै आएको छ । जसबाट हजारौं गरिब तथा बिपन्न विरामीहरु लाभान्वित भइरहेका छन् ।
