गोरखाको आरुघाटमा केएमसी र पिपुल्स डेन्टल कलेजको निःशुल्क स्वास्थ्य शिविर

हाम्रा कुरा

प्रकाशित २०७८ चैत १ मंगलबार

गोरखा । गोरखामा सोमबार निःशुल्क शिविर सञ्चालन गरिएको छ । आरुघाट गाउँपालिका वडा नंम्बर ९ सँग सहकार्य गरेर काठमाडौंको सिनमंगलस्थित काठमाडौं मेडिकल कलेज र नयाँ बजारस्थित पिपुल्स डेन्टल कलेज तथा जनरल हस्पिटलले दुई दिने निःशुल्क स्वास्थ्य शिविर आयोजना गरेको हो ।

आरुघाट प्राथमिक स्वास्थ्य केन्द्रमा सञ्चालन भएको शिविरमा पहिलो दिन ९५३ जना बिरामीको निःशुल्क स्वास्थ्य परीक्षण गरिएको छ । शिविरमा १८९ जनाको रक्त परीक्षण, १७७ जनाको भिडियो एक्सरे र १२१ जनाको ईसीजी गरिएको केएमसीका जेनेरल मेनेजर नारायण दाहालले जानकारी दिए ।

त्यस्तै दाँतको समस्या भएर शिविरमा आएका २६ जनाको दाँत खोलिएको छ भने शिविरमा उपचार सम्भव नभएका ३२ जनालाई थप उपचारका लागि अस्पताल रेफर गरिएको आयोजकले जनाएको छ । शिविर मंगलबार पनि जारी रहने छ ।

केएमसीले विभिन्न जिल्लामा पुगेर निःशुल्क स्वास्थ्य शिविर सञ्चालन गर्दै आएको छ । डा.सुनिल शर्माले केएमसी अध्यक्षको जिम्मेवारी सम्हालेपछि गत वर्षदेखि निःशुल्क स्वास्थ्य शिविर सञ्चालनलाई तीव्रता दिएको केएमसीले यसबीचमा लाखौं बिरामीको निःशुल्क उपचार गरिसकेको छ ।