म्याग्दी । उत्तरी म्याग्दीको रघुगङ्गा गाउँपालिका-४, दर्मिजामा रहेका प्राकृतिक तातोपानीका कुण्ड जानका लागि बाटो र कुण्डमा भौतिक पूर्वाधार निर्माण भएपछि दुर्गम स्थानमा रहेका तातोपानी कुण्ड व्यवस्थित बनेका छन् । दर्मिजा गाउँको पुछारमा रघुगङ्गा नदीको किनारमा रहेको मुहानबाट ५० डिग्री सेल्सियसभन्दा बढी तापक्रमको तातोपानी निस्कने गर्दछ ।
प्राकृतिक तातोपानीमा डुब्दा विभिन्न रोग निको हुने विश्वास गरिन्छ । यस अगाडि सानो पोखरी रहेकामा गतवर्ष जलस्रोत तथा सिँचाइ डिभिजन कार्यालय म्याग्दीको सहयोगमा पोखरी निर्माण गरिएको तातोपानी पूर्वाधार निर्माण उपभोक्ता समितिका अध्यक्ष बिप्रसाद पुनले जानकारी दिए ।
रघुगङ्गा नदीको किनारमा अलगअलग ठाउँमा चार पोखरी बनाइएको छ । कुण्डमा जाने ठाउँको दक्षिणतर्फ जल बराहको मन्दिर छ । मन्दिरको दाहिनेतर्फ रहेको पोखरीमा प्लाष्टिकको छाना हालिएको छ । सो पोखरीमा एक पटकमा २५ जनासम्मले डुबेर उपचार सेवा लिँदै आएका छन् ।
मन्दिरको देब्रेतर्फ सानाठूला गरी तीन पोखरी छन् । एउटा पोखरीमा २० जना, अर्कोमा १० जना र तेस्रो पोखरीमा पनि १० जनाले एकसाथ बसेर डुब्नसक्ने गरीे पक्की पर्खालसहित निर्माण गरिएको छ ।
यीे पोखरी निर्माण गर्न जलस्रोत तथा सिँचाइ डिभिजन कार्यालयले रु ३५ लाख सहयोग गरेको थियो । कोरोनाको जोखिमका बेलामा पनि स्थानीय मजदुर परिचालन गरि पोखरी निर्माण गरिएको दर्मिजा तातोपानी कुण्ड व्यवस्थापन समितिका पूर्वअध्यक्ष तबहादुर शेरपूजाले बताए ।
सो मुहानको पानी सङ्कलन गरे छालासम्बन्धी रोग, चोटपटक, बज्रिएको, सुन्निने जस्ता समस्या निको हुने विश्वास छ । यहाँ स्नान गर्न आउने पाहुना तथा पर्यटकलाई बस्न मिल्ने स्थानको निर्माण पनि यस अगाडि भइसकेको स्थानीय ललिता गर्बुजाले बताए ।
यस पोखरीको नजिक एउटा आर्कषक झरना रहेको छ । गण्डकी प्रदेशसभा सदस्य विनोद केसीको पहलमा यो योजनाका लागि बजेट विनियोजन गरिएको हो । यस स्थानलाई सुरक्षित राख्न अहिले तटबन्धको कार्य भइरहेको अध्यक्ष पुनले जानकारी दिए ।
